Тошкент метрополитени 5 вагонли поездлар ҳақидаги хабарларга изоҳ берди
Тошкент метрополитенида беш вагонли поездлар қатнови ҳақидаги хабарлар йўловчиларда катта қизиқиш уйғотди. Расмий маълумотлар бу ўзгаришнинг аниқ муддатларига ойдинлик киритди.
Бугун метрополитен йўловчилар энг кўп фойдаланаётган жамоат транспортларидан бирига айланган. Шундай бир вазиятда ижтимоий тармоқларда жорий йил 20 ноябрдан бошлаб Тошкент метрополитенида беш вагонли поездлар қатнови йўлга қўйилиши ҳақида хабарлар тарқалди.
“Тошкент метрополитени” АЖ матбуот хизмати хабарига кўра, беш вагонли ҳаракат таркиблари 2026 йил 20 ноябрдан бошлаб йўловчилар ташишга жалб этилмайди. Бу борадаги ишлар давом этаётган бўлсада, уларни тўлиқ йўлга қўйиш учун ҳали вақт керак. Қўшимча вагонларни харид қилиш бўйича концепция ишлаб чиқилган. Бу жараёнда вагонларни ишлаб чиқариш, харид қилиш ва Тошкент шаҳрига етказиб бериш муддатлари ҳамда ташкилий масалалар ҳисобга олинган.
Режага мувофиқ, 2027 йил сентябрига қадар мавжуд ҳаракат таркибларининг 80 фоизи, яъни 54 та поездни беш вагонли шаклга ўтказиш кўзда тутилган. Демак, беш вагонли поездлар бўйича режа бор, аммо бугунги кунда йўловчилар кутаётган натижа ҳали амалга ошгани йўқ. Қолаверса, режалаштирилган 54 та поезднинг барчаси бир вақтда эмас, белгиланган муддатга қадар босқичма-босқич беш вагонли таркибга ўтказилиши кутилмоқда.
Бундан ташқари Метрополитен ҳозирги йўловчилар оқимини ҳисобга олиб, қўшимча захира ҳаракат таркибларини жалб этиш орқали поездлар орасидаги интервални ўртача 2–3 дақиқагача қисқартириш чораларини кўраётганини маълум қилди.
Маълумот ўрнида таъкидлаш лозимки, узоқ йиллар давомида метрополитенда 29 та бекат бўлган, йўналишларнинг умумий узунлиги 38 километрни ташкил этган. Сўнгги 7 йил ичида яна 33 километр метро йўли қурилган ва 21 та янги бекат фойдаланишга топширилган. Соҳада 530 нафардан ортиқ ходим фаолият олиб боради. Уларнинг 2200 нафарга яқини ёшлар.
Йўловчилар учун фақат вагонлар сони эмас, поезднинг ўз вақтида келиши, бекатларда ортиқча кутиб қолмаслик ва вагонлардаги юкламани камайтириш ҳам аҳамиятли. Тошкент метросида кунлик йўловчилар оқими 1,2 миллиондан ортиқ экани ҳисобга олинса, бу масаланинг кўлами янада яққол намоён бўлади. Хусусан, 20 октябрь куни “Пахтакор” бекатида икки поезднинг бир вақтда келиши ортидан қисқа муддатли тирбандлик юзага келгани ҳам йўловчилар оқимини самарали бошқариш қанчалик муҳимлигини кўрсатди.
Муҳайё Тошқораева,
ЎзА
