Perlis shtati valiahd shahzodasi: O‘zbekistonda qisqa vaqtda olamshumul o‘zgarishlar amalga oshirilgan
Samarqand viloyati hokimi A.Boboyev Nabaviy meros bo‘yicha xalqaro anjumanda ishtirok etish uchun yurtimizga tashrif buyurgan Malayziyaning Perlis shtati valiahd shahzodasi Tuanku Sayyid Fayzuddin Putra ibn Tuanku Sayyid Sirojiddin Jamolullayl boshchiligidagi delegatsiya bilan uchrashdi.
Muloqot avvalida A.Boboyev mehmonlarni Samarqandga tashrifi bilan qutlab, keyingi yillarda davlat rahbarlarining faol tashqi siyosati va do‘stona munosabatlari tufayli O‘zbekiston va Malayziya o‘rtasidagi hamkorlik izchil rivojlanib borayotganini ta’kidladi. Xususan, turizm sohasidagi aloqalar yil sayin mustahkamlanib, qamrovi kengaymoqda.
– Yil boshidan buyon Samarqandga kelgan malayziyalik sayyohlar avvalgi yilga nisbatan uch barobar oshgani ko‘p narsadan dalolat beradi, – dedi A.Boboyev. – Savdo-iqtisodiy, madaniy-gumanitar aloqalarni kengaytirish maqsadida har yili delegatsiyalar tashriflari amalga oshirilmoqda. Yangidan barpo etilgan Imom Buxoriy majmuasi hududidagi mehmonxonalardan biri bugungi kunda malayziyalik tadbirkor tomonidan boshqarilmoqda. Ushbu davlatdagi “Nasirul Qur’on” nashriyoti Imom Buxoriy majmuasi uchun 20 ming dona Qur’on sovg‘a qilgani diniy-ma’rifiy, ziyorat turizmi yo‘nalishidagi aloqalarimiz mustahkamlanib borayotganini ko‘rsatadi. Perlis shtati muftiysi, professor, Dato doktor Muhammad Asri Zaynul Obiddin janoblari esa O‘zbekistonning Malayziyadagi turizm elchisi hamda Samarqandning yaqin do‘sti hisoblanadi.
Perlis shtati valiahd shahzodasi Nabaviy meros bo‘yicha X xalqaro anjuman Samarqandda, Imom Buxoriy xalqaro ilmiy-tadqiqot markazida o‘tkazilayotgani uchun minnatdorlik bildirib, bu O‘zbekiston va Malayziya o‘rtasidagi ta’lim, ilm-fan va diniy-ma’rifiy sohalardagi yaqin hamkorlikning natijasi ekanligini qayd etdi.
[gallery-31803]
– Payg‘ambarimiz ilmiy merosiga bag‘ishlangan nufuzli anjuman doirasida yana Samarqandda bo‘lish, buyuk muhaddis Imom Buxoriy majmuasini ziyorat qilish baxti nasib etganidan xursandman, – dedi Tuanku Sayyid Fayzuddin Putra ibn Tuanku Sayyid Sirojiddin Jamolullayl. – Men O‘zbekistonga, jumladan, Samarqandga bir necha bor kelganman. Lekin bugun kelib shunga amin bo‘ldimki, 2012-yildagi oxirgi tashrifimdan keyin mamlakatda olamshumul o‘zgarishlar amalga oshirilibdi. Ayniqsa, Imom Buxoriy majmuasining qaytadan bunyod etilgani, bu qutlug‘ qadamjoning ko‘rku salobatini ko‘rib, hayratda qoldim. Bu O‘zbekistoning 1991-yilda mustaqil davlat sifatida paydo bo‘lishini emas, balki uch ming yillik tarix, boy davlatchilik an’analariga ega mamlakat ekanligini ko‘rsatadi.
Muloqot davomida tomonlar Samarqand viloyati va Perlis shtati o‘rtasida turli sohalarda hamkorlikni rivojlantirish masalalarini ham muhokama qildi.
G‘.Hasanov, A.Isroilov (surat), O‘zA muxbirlari
