Ўзбекистоннинг олтин-валюта захираси 70 миллиард доллардан ошди
Ўзбекистон Марказий банкининг олтин-валюта захиралари ҳажми 2026 йил 1 май ҳолатига кўра, 70,9 миллиард долларга етди.
Апрель ойи давомида захиралар қарийб 2 миллиард долларга ошган бўлса, март ойида аксинча 8,1 миллиард долларлик пасайиш кузатилган эди.
Марказий банк маълумотларига кўра, захиралар таркибидаги олтин активлари қиймати 743,6 миллион долларга ортиб, умумий ҳисобда 61,6 миллиард долларни ташкил этган. Шу билан бирга, олтиннинг жисмоний ҳажми маълум даражада қисқарган. Хусусан, март ойида 13,4 миллион трой унцияни ташкил этган кўрсаткич апрель якунида 13,3 миллион трой унцияга тушган. Бу эса апрель ойида тахминан 3 тонна атрофида олтин сотилган бўлиши мумкинлигини англатади.
Жаҳон бозорида олтин нархининг ўсиши захиралар қиймати ошишига асосий омил бўлди. Апрель ойида бир трой унция олтин нархи 1,6 фоизга қимматлашиб, 4 625,8 доллар даражасига етди. Натижада жисмоний ҳажм қисқарганига қарамай, олтин активларининг умумий қиймати юқори даражада сақланиб қолди.
Марказий банк портфелидаги халқаро қимматли қоғозлар ҳажми эса апрель ойида ўзгаришсиз қолиб, 1,5 миллиард доллар даражасида сақланган. Шу билан бирга, 2025 йил якунига келиб мазкур активлар ҳажми сезиларли ўсгани қайд этилмоқда. Жумладан, ўтган йил давомида халқаро қимматли қоғозлар портфели 101,7 миллион доллардан 1,5 миллиард долларгача кўтарилган.
Хорижий валютадаги захиралар ҳам ўсиш қайд этди. Апрель ойида уларнинг ҳажми 7,6 миллиард доллардан 8,7 миллиард долларга етган.
Халқаро захираларнинг ўсиши мамлакат молиявий барқарорлиги, ташқи иқтисодий хавфларга чидамлилик ҳамда миллий валюта барқарорлигини таъминлашда муҳим аҳамият касб этади.
Маълумот учун, жорий йилнинг биринчи чорагида Ўзбекистон 25 тонна олтин харид қилиб, дунёда энг кўп олтин сотиб олган давлатлар орасида иккинчи ўринни эгаллаган эди.
Ш.Маматуропова, ЎзА
