Малайзиянинг Перлис университети делегацияси Бухоро муҳандислик-технология институтида бўлди. Делегация ташрифи давомида институт ректори Садоқат Сиддиқова ҳамда меҳмонлар ўртасида музокаралар олиб борилди.
Дастлаб сўнгги йилларда икки давлат раҳбарларининг ташаббуси билан Ўзбекистон билан Малайзия ўртасидаги дўстлик ва кўп қиррали шериклик муносабатларини янада кенгайтирилаётганлигини таъкидланди.
Музокаралар давомида институтда Нанолаборатория ташкил этиш ҳамда яшил қурилиш маҳсулотларини ишлаб чиқариш технологияси, Наноэлектроника муҳандислиги каби йўналишларни ҳамкорликда ташкил этиш бўйича дастлабки келишувларга эришилди.
– Шунингдек, музокара кун тартибидан магистратура босқичида қўшма дастур ташкил этиш, тадқиқотчи ва изланувчиларга икки томондан илмий раҳбарликни ташкил этиш, тадқиқотчиларнинг илмий фаолиятида кўмаклашиш, ҳудудни ижтимоий ва иқтисодий ривожлантиришга доир ҳамкорликдаги лойиҳаларни ташкил этиш ўрин олди, – дейди институт ректори Садоқат Сиддиқова.
Зариф Комилов, ЎзА мухбири