Омбудсман иш ҳақи ва меҳнат муносабатларига оид 2,3 миллиард сўмдан зиёд тўловлар ундирилишига кўмаклашган
Олий Мажлиснинг Инсон ҳуқуқлари бўйича вакили (Омбудсман) фуқароларнинг мурожаатлари асосида уларнинг ҳақ-ҳуқуқларини ҳимоя қилишга эътибор қаратмоқда.
Омбудсманга Олмазор туманидаги умумий ўрта таълим мактабларидан бирида фаррош бўлиб ишлаб келган Н.Н. мурожаат қилган.
Мурожаатда у меҳнат вазифасини бажариш чоғида соғлиғига зарар етгани, бироқ етказилган зарар ва даволаниш харажатлари унга қонунчиликда белгиланган тартибда компенсация қилиб берилмаганидан норози эканини билдирган.
Мурожаат Омбудсман томонидан назоратга олинган ҳолда ўрганилиб, фуқаро Н.Н. манфаатида Фуқаролик ишлари бўйича Шайхонтоҳур туманлараро судига Омбудсманнинг даъво аризаси киритилди.
Натижада суд қарори билан фуқаро Н.Н. фойдасига меҳнат вазифасини бажариш пайтида соғлиғига етказилган зарар учун бир йўла тўланадиган нафақа ва маънавий зарар сифатида 22 миллион сўмдан ортиқ компенсация ундирилиши белгиланди.
Маълумот учун, Омбудсман кўмагида 2025 йил якунларига кўра, фуқароларнинг иш ҳақи ва меҳнат муносабатларига оид 2 миллиард 306 миллион сўмдан ортиқ тўловлар ундирилган.
Н.Абдураимова,
ЎзА
