Олтин саралаш фабрикаси қурилиши якуний босқичда
ОКМК геологлари томонидан Ковулди конининг хомашё базасини кўпайтириш ва бўшаётган қувватларни тўлдириш мақсадида 2016-2022 йилларда янги “Қуйи-Кенжасой” олтин конида геология-қидирув ишлари олиб борилди. Ҳисоб-китобларга кўра, бу ерда фойдали қазилмаларни қазиб олиш ўн йилдан ортиқ вақт давом этади.
Маълумки, 2025 йилда ушбу конни очиш ишлари бошланган бўлиб, айни пайтда кон-капитал ишлари давом этмоқда. Олтин таркибли рудани қазиб олиш 2027-2028 йилларга мўлжалланган. Коннинг ён томонларида эса геологлар қўшимча қидирув ишларини олиб бормоқда. Ушбу коннинг очилиши орқали Ковулди олтин саралаш фабрикаси қурилмоқда. Янги фабрика “Ковулди” ва “Қуйи-Кенжасой” конларида қазиб олинадиган маъданларни қайта ишлашга мўлжалланган бўлиб, йилига 200 минг тонна хомашёдан қимматбаҳо металлар ажратиб олинади.
Фабрика қурилиши “Олмалиқметаллурқурилиш” трести томонидан амалга оширилмоқда. Бугунги кунга келиб объектда қурилиш ва монтаж ишлари 90 фоизга бажарилди. Жумладан, шу кунга қадар 2 қаватли маъмурий хўжалик биносининг қурилиши тугалланди. Ишлаб чиқариш корпусида қурилиш ишлари якунланиб, металл конструкцияларни монтаж ишлари тўлиқ ҳажмда якунланди.
Очиқ маъданлар омборининг қурилиш ишлари ҳам якунланиб, реагентлар омборида эса қурилиш монтаж ва пардозлаш ишлари амалга оширилмоқда.Флотамашиналар, гидроциклон ва тегирмонлар, классификатор, контакт чан ва 1-сонли қуюлтиргич каби технологик ускуналар ўрнатиб бўлинди.
Муҳандис техник ходимлар ва ишчилар учун мўлжалланган ёрдамчи биноларда пардозлаш ишлари амалга оширилмоқда. Фабрика биноларини ёритиш тизими электр кабеллари монтаж қилинмоқда. Юк кўтариш қуввати 20, 5 ва 2 тонна бўлган кўприкли кранларни ўрнатиш ишлари якунланди. Қўриқлаш хизмати ходимлари учун қурилиш ишлари давом этмоқда, объектда кенг кўламли ободонлаштириш ва кўкаламзорлаштириш ишлари амалга оширилмоқда.
Фабрика қурилиш ишларида шунингдек, Ихтисослаштирилган таъмирлаш ишлари бошқармаси, Ишлаб чиқаришни автоматлаштириш бошқармаси, Техник хавфсизлик тизими хизмати, Автомобиль транспорт бошқармаси, Моддий техник таъминоти бошқармаси, Ковулди кон бошқармаси каби меҳнат жамоалари ҳам фаол иштирок этмоқда. Қуриш ишларини ташкил этишда Капитал қурилиш бошқармаси техник ишлаб чиқариш бўлими ҳамда лойиҳа ишларини амалга оширишда Лойиҳа ишлари бошқармаси меҳнат жамоаларининг ҳам алоҳида ўрни бор.
Ушбу фабриканинг барпо этилиши Олмалиқ кон-металлургия комбинатида амалга оширилаётган стратегик лойиҳалардан бири ҳисобланади. Лойиҳанинг ишга туширилиши маҳаллий хомашё базасидан оқилона фойдаланиш ва олтин ишлаб чиқариш ҳажмини тизимли равишда ошириш орқали миллий олтин захираларимизни мустаҳкамлашга хизмат қилади.
Эътиборли жиҳати, фабрикага ўрнатилган ускуналар комбинатнинг Марказий таъмирлаш-механика заводи томонидан маҳаллийлаштириш дастури асосида тайёрланди. Мутахассисларнинг маълумотига кўра фабрика ишга туширилгач, қўшимча 151 та янги иш ўрни яратилади. Комбинатда Ангрен кон бошқармаси ва Наманган вилоятидаги Чодак кон бошқармаларида ҳам олтин саралаш фабрикалари мавжуд.
Мазкур фабрика яқин кунларда фойдаланишга топширилиши кўзда тутилган.
А.Мусаев,ЎзА.
