Муҳожирлар ови бошланадими?
Жанубий Африканинг бир неча шаҳрида муҳожирларга қарши норозилик ортидан ҳаёт деярли тўхтаб қолди. Кўплаб корхоналар ишламаяпти, дўконлар ёпилди, жамоат транспорти ҳаракати чекланди. Намойишчилар мамлакатда ноқонуний яшаётган чет элликлар учун белгилаган муҳлат тугаганини эълон қилгач, вазият янада таранглашди.
Африканинг бошқа давлатларидан келган минглаб одам ишга чиқишдан қўрқяпти. Айримлар эҳтимолий ҳужумдан хавотирланиб, намойиш бошланишидан олдинроқ яшаш жойини тарк этган. Йоханнесбург ва Дурбан каби йирик шаҳарларда қўлида таёқ ушлаган оломон кўчаларга чиққан.
Апрель ойидан буён давом этаётган тартибсизлик оқибатида камида беш киши ҳалок бўлган. Минглаб инсон турар жойини тарк этган, кўплаб бино ва мулкка зарар етган. Ҳуқуқ ҳимоячилари таъкидлашича, ҳужум чоғида қонуний ҳужжатга эга муҳожирлар билан ноқонуний келганлар фарқланмаяпти.
Намойишчилар чет элликларни иш ўрни эгаллаб олиниши, жиноятчилик ўсиши ва ижтимоий хизматга босим кучайишида айбламоқда. Тадқиқотчилар бундай даъвони тасдиқлайдиган етарли далил мавжуд эмаслигини айтган. Шунга қарамай, юқори даражадаги ишсизлик ва иқтисодий қийинчилик жамиятдаги норозиликни кучайтирмоқда.
Ҳукумат тартибсизликнинг олдини олиш учун минглаб полиция ходимини сафарбар қилди. Президент Сирил Рамафоса аҳолининг миграция билан боғлиқ хавотири ўринли эканини тан олган ҳолда, норозилик зўравонлик ва таҳдидга айланмаслиги кераклигини таъкидлади. Кузатувчилар эса юзага келган вазият мамлакатнинг инсон ҳуқуқи борасидаги обрўсига жиддий соя ташлаётганини қайд этмоқда.
Мусулмон Зиё, ЎзА
