“Moody’s” Ўзбекистоннинг суверен кредит рейтингини оширди
Бу ҳақда Иқтисодиёт ва молия вазирлиги ахборот хизмати маълум қилди. Унда қайд этилишича, “Moody’s” халқаро рейтинг агентлиги Ўзбекистоннинг суверен кредит рейтингини бир поғона юқорига кўтариб, “Ba3”дан “Ba2”га оширди. Рейтинг кутилмаси эса ижобийдан барқарорга ўзгартирилди.
Агентлик бу қарорни мамлакатда институционал ислоҳотлар изчил давом этаётгани, иқтисодий сиёсат самарадорлиги ортиб бораётгани ҳамда иқтисодий ва фискал барқарорлик мустаҳкамланаётгани билан изоҳлади.
Таъкидланишича, сўнгги бир йилда Ўзбекистоннинг суверен кредит рейтинги олти марта яхшиланган бўлиб, бу янги қарз маблағларини жалб қилиш харажатларини ўртача 1,5 фоизга камайтириш имконини берган. Шунингдек, рейтингнинг ўсиши натижасида 20 дан ортиқ банк ва корхоналарнинг рейтинглари ҳам яхшиланиб, уларнинг ташқи қарз жалб қилиш харажатлари пасайган.
“Moody’s” ҳисоботида иқтисодиётнинг диверсификация қилиниши, бюджет интизомининг кучайиши, давлат иштирокини қисқартириш, энергетика соҳасини либераллаштириш ва хусусийлаштириш жараёнлари ижобий баҳоланган.
Агентлик маълумотларига кўра, Ўзбекистон иқтисодиёти ташқи хатарларга қарамай юқори ўсиш суръатларини сақлаб қолмоқда. Хусусан, иқтисодий ўсиш 2025 йилда 7,7 фоизни, 2026 йилнинг биринчи чорагида эса 8,7 фоизни ташкил этди.
Шу билан бирга, халқаро захираларнинг юқори даражаси, бюджет тақчиллигининг қисқариши ва давлат қарзининг барқарор сақланиши мамлакатнинг кредит қобилиятини қўллаб-қувватловчи муҳим омиллар сифатида эътироф этилган.
Н.Зиёдуллаева, ЎзА
