Мебелсозлик соҳасида янги истиқболли лойиҳалар
Бухоро вилоятида инвестиция муҳитини янада яхшилаш, замонавий ишлаб чиқариш қувватларини йўлга қўйиш ва янги иш ўринлари яратишга қаратилган амалий ишлар изчил давом этмоқда.
Шу мақсадда Бухоро вилояти ҳокими Ботир Зарипов Бухорода фаолият юритаётган “SD-Turkmen haly” масъулияти чекланган жамият шаклидаги қўшма корхона раҳбари Солмаз Жумаева ҳамроҳлигида Бухорога ташриф буюрган нуфузли делегация вакиллари билан учрашув ўтказди.
Делегация таркибидан Евроосиё ўзини ўзи бошқариш органлари иттифоқи президенти Ҳасан Ченгиз, “Бурано мебел” компанияси директорлар кенгаши раиси Адем Топрак ҳамда компания директорлар кенгаши аъзоси Селчук Четин ўрин олган.
Учрашув давомида мебелсозлик соҳасида йирик инвестиция лойиҳаларини амалга ошириш, замонавий технологияларни жорий этиш ва Бухоро вилоятида турк компаниясининг фаолиятини йўлга қўйиш истиқболлари атрофлича муҳокама қилинди.
Туркия томони ўз компаниясининг ишлаб чиқариш салоҳияти, халқаро бозордаги тажрибаси ҳамда яқин келажакка мўлжалланган режалари ҳақида батафсил маълумот берди. Шунингдек, Ўзбекистонда, айниқса, Бухоро вилоятида ишлашга катта қизиқиш билдираётганини таъкидлаб, кўриб чиқилаётган лойиҳаларни ҳаётга татбиқ этиш бўйича яқин ҳамкорлик қилишга тайёр эканини маълум қилди.
Шу билан бирга, туркиялик ишбилармонлар мамлакатимизда кейинги йилларда амалга оширилган кенг кўламли ислоҳотлар, қулай бизнес муҳити, ривожланган инфратузилма ва инвесторлар учун яратилган имкониятларни юқори баҳолади. Улар Бухорода кузатилаётган янгиланишлар ва иқтисодий фаоллик катта таассурот қолдирганини қайд этди.
Учрашув якунида томонлар ҳамкорликни амалий босқичга олиб чиқиш, аниқ таклиф ва механизмларни ишлаб чиқиш, кейинги музокараларни изчил давом эттириш бўйича келишиб олди.
Бу ҳамкорлик Бухоро вилоятида мебелсозлик саноатини янги босқичга олиб чиқиш, замонавий корхоналар ташкил этиш, аҳоли бандлигини таъминлаш, янги иш ўринлари яратиш ҳамда экспорт салоҳиятини янада оширишга хизмат қилиши кутилмоқда.
Зариф Комилов, ЎзА мухбири.
