Лавров: Уруш тақдирини фронт ҳал қилади (+видео)
Россия ташқи ишлар вазири Украина президенти Володимир Зеленскийнинг Россия президенти Владимир Путинга йўллаган очиқ мактубини танқид қилди ва Киев билан тўғридан-тўғри музокаралар ўтказиш эҳтимолини рад этди, деб хабар қилди Euronews
Лавров мазкур мактубнинг бутун дунё бўйлаб тарқатилганидан норози эканини алоҳида таъкидлаб, маданиятли одамлар бундай йўл тутмайди, деди.
Унинг айтишича, Кремль бу ҳолатни Украинанинг музокараларга қизиқиш билдирмаётганининг белгиси деб баҳоламоқда. Ўтган ҳафта Украина президенти Путинга очиқ мактуб эълон қилиб, тўғридан-тўғри музокаралар ўтказишни таклиф этган эди.
Путин эса Санкт-Петербург халқаро иқтисодий форумида бу таклифни рад этиб, Зеленский билан учрашишдан маъно кўрмаяпман, деб айтди.
Кейинчалик Зеленскийнинг ташаббусини Франция, Германия ва Буюк Британия раҳбарлари қўллаб-қувватлади. Улар якшанба куни Украина президенти билан биргаликда қўшма баёнот қабул қилиб,«адолатли ва барқарор тинчлик» учун зарур деб ҳисобланган бешта шартни баён қилди.
Бу шартлар қаторида зудлик билан тўлиқ ўт очишни тўхтатиш ҳамда музокараларни мавжуд фронт чизиғи асосида олиб бориш таклифлари ҳам бор.
Путин матбуот котиби Дмитрий Песков эса душанба кунги брифингда Европа ташаббусини рад этиб, Европа раҳбарлари Украинага ҳарбий ёрдам беришда давом этаётгани билан ўзларининг тинчлик ҳақидаги чақириқларига ўзлари путур етказаётганини айтди.
<iframe width="480" height="860" src="https://www.youtube.com/embed/R6pKOr4MZWE" title="Lavrov: Urush taqdirini front hal qiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев (видео), ЎзА
