Исроил - Ливан сулҳи эълон қилинди, бироқ унга амал қилинмаяпти (+видео)
АҚШ президенти Дональд Трамп Исроил ва Ливан ўртасида 10 кунлик сулҳ кучга киришини айтди, деб хабар берди Euronews.
АҚШ президентининг маълум қилишича, икки давлат раҳбарлари тинчликка эришиш учун 10 кунлик ўқ отишни тўхтатишга келишиб олган.
Трамп АҚШ вице-президенти Жей Ди Вэнс, давлат котиби Марко Рубио ва АҚШ генерали Дэн Кейнга Исроил ва Ливан билан бирга ишлаб, барқарор тинчликка эришиш вазифасини топширганини билдирди.
Кейинроқ у Биньямин Нетаньяҳу ва Ливан президенти Жозеф Аунни Оқ уйга таклиф қилиб, жиддий музокаралар ўтказишни режалаётганини айтди.
Шу орада Исроил бош вазири Биньямин Нетаньяҳу хавфсизлик идораси аъзолари билан шошилинч телефон йиғилиши ўтказган. Унда Ливан билан ўқотишни тўхтатиш масаласи муҳокама қилинди, деб хабар берди Исроил матбуоти.
Бироқ, орадан кўп вақт ўтмай DW нашри Исроил ва Ливан ўртасида сулҳ кучга кирганига қарамай, Исроил армияси ҳужумларни давом эттиргани ҳақида хабар берди. Унда Ливан ҳарбийлари 17 апрель куни кучга кирган сулҳ бир неча бор бузилгани ва сулҳнинг илк соатларида ҳам Исроил армияси Ливан шаҳарларини ўққа тутганини маълум қилган.
Маълумот ўрнида айтадиган бўлсак, можаро АҚШ ва Исроилнинг Эронга қарши урушидан кейин яна авж олган. Жанглар Ливан жануби, шарқий ҳудудлари ва пойтахтгача етиб борган. Ливан ҳукуматининг маълумотларига кўра, март ойидан бери жанглар давомида 2000 дан ортиқ одам ҳалок бўлган, тахминан 1 миллион киши ўз юртида қочқинга айланган. Кўпчилик, 10 кунлик сулҳни урушни батамом тугатиш учун қўйилган дастлабки қадам сифатида баҳолаётган эди, афсуски умидлар пучга чиқмоқда...
<iframe width="650" height="420" src="https://www.youtube.com/embed/O7rjVYht85k" title="Isroil - Livan sulhi e’lon qilindi, biroq unga amal qilinmayapti" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
