Ғолиблар рағбатлантирилди
Андижонда “Уйғониш” ёшлар адабий танловининг вилоят босқичи бўлиб ўтди.
Ўзбекистон Ёзувчилар уюшмаси томонидан ёш ижодкорларни аниқлаш, уларни қўллаб-қувватлаш, ижодий имкониятларини рўёбга чиқариш, миллий қадриятлар, адолат, инсонпарварлик ва ҳалоллик каби ғояларни адабиёт орқали тарғиб қилиш мақсадида ўтказилаётган мазкур танловнинг вилоят босқичида 64 нафар 18 - 30 ёшли ижодкор назм ва наср йўналишида ўзларининг ижодий ишлари билан иштирок этди.
Тақдим этилган ижод намуналари нуфузли ҳакамлар ҳайъати томонидан муносиб баҳоланди.
– Иштирокчиларнинг ижод намуналарини кўриб чиқишда инсоний фазилатларни улуғлаш, ватанпарварлик, бугунги тинч ва фаровон ҳаётга шукроналик ғоялари билан суғорилган, шунингдек, маънавий-тарбиявий аҳамиятга эга, ҳалоллик, инсонпарварлик, ҳамжиҳатлик, халқимизнинг ўзига хос, азалий қадриятлари улуғланган мавзуларга алоҳида эътибор қаратилди, – дейди Ўзбекистон Ёзувчилар уюшмаси вилоят бўлими раҳбари Ҳуршида Ваҳобжон қизи. – Тақдим этилган ижод намуналари билан танишиш жараёнида ёш ижодкорларнинг белгиланган йўналишларда самарали ижод қилаётганликларига гувоҳ бўлдик. Ишонч билан айта оламанки, улар келажакда халқимизга манзур бўладиган асарлар яратадиган ижодкорлар бўлиб камол топади.
Танловнинг якуний натижаларига кўра, назм йўналишида Юсуфбек Садбаралиев биринчи, Мавлудахон Азимова иккинчи, Моҳидил Абдуллаева учинчи ўринга сазовор бўлди. Наср йўналишида эса биринчи ўрин Фирдавс Шокировга, иккинчи ўрин Ирода Орифжоновага, учинчи ўрин эса Иззатулло Олимовга насиб этди.
Ғолиблар танловнинг мамлакат босқичида қатнашиш ҳуқуқини қўлга киритди.
Ғолибларга диплом ҳамда биринчи ўрин соҳибларига 7 миллион сўмдан, иккинчи ўрин эгаларига 4 миллион сўмдан, учинчи ўринни қўлга киритган иштирокчиларга 2 миллион сўмдан пул мукофотлари топширилди.
Фахриддин Убайдуллаев,
ЎзА мухбири
