Словения пойтахти Любляна шаҳрида дзюдо бўйича Европа Кубоги ўтказилмоқда.
Қувонарлиси, мусобақанинг биринчи кунги беллашувлар якунига кўра, Ўзбекистон терма жамоаси аъзолари 3 та медалга сазовор бўлди.
Аниқроқ айтадиган бўлсак, Алексей Будолин бош мураббийлигидаги Ўзбекистон эркаклар терма жамоаси 2 та олтин ва 1 та бронза медалига эга чиқди. Жумладан, Самариддин Қўчқоров (-60 кг.) ва Дилшод Ҳамроев (-66 кг.) ўз вазн тоифаларида олтин медални қўлга киритган бўлса, Элбек Тожиев (-73 кг.) бронза медаль билан тақдирланди.
Шу тариқа, терма жамоамиз медаллар жамғариш бўйича етакчига айланди. Кучли учликка Словения ва Венгрия терма жамоалари кирди. Кейинги поғоналарда Италия, Германия, Буюк Британия, Украина, Қозоғистон, Сербия ва Туркия делегациялари бор.
Маълумот учун, нуфузли Европа Кубогида дунёнинг 44 давлатидан келган 500 нафарга яқин дзюдочи медаллар ва жаҳон рейтинги учун бериладиган қимматли очколар учун баҳс олиб бормоқда. Мусобақа бугун, 15 февраль куни ўз якунига етади.
Жавоҳир Тошхўжаев, ЎзА