Божхонада йирик қонунбузарликка чек қўйилди
Қорақалпоғистон Республикаси “Довут-ота” чегара божхона пости орқали Россия Федерациясидан кириб келган юк автотранспорт воситасига ортилган товар моддий бойликлар “қизил йўлак”га ўтказилди ва белгиланган тартибда божхона кўригидан ўтказилди.
Натижада ҳеч қандай ҳужжатлари бўлмаган умумий соф оғирлиги 12 тоннадан ортиқ бўлган, 105 турдаги дастлабки қиймати тахминан 1 миллиард 850 миллион сўм бўлган озиқ-овқат маҳсулоти борлиги аниқланди.
Аниқланган барча товар-моддий бойликлар белгиланган тартиб асосида вақтинча сақловга олинди ва қонуний жиҳатдан расмийлаштирилди. Ҳозирда мазкур ҳолат юзасидан Қорақалпоғистон Республикаси божхона бошқармаси томонидан терговга қадар текширув ҳаракатлари олиб борилмоқда.
Довуд Абибуллаев, ЎзА мухбири.
