Бирлашган Араб Амирликларининг Дубай шаҳрида бокс бўйича IBA жаҳон чемпионатининг навбатдаги кунида терма жамоамизнинг уч нафар вакили муваффақиятли иштирок этди.

Аниқроқ айтадиган бўлсак, мусобақада вазни -75 кг бўлган боксчимиз Фазлиддин Эркинбоев илк жангини Қирғиз Республикаси вакили Сиргак Абдижапар уулуга қарши ўтказди ва 5:0 ҳисобида ғалабага эришди. Шу тариқа у кейинги даврада арманистонлик Вахтанг Арутюнянга қарши рингга кўтариладиган бўлди.

Жаҳон чемпионатининг -60 кг вазн тоифасида бўлиб ўтиши керак бўлган Абдумалик Халоков ва эквадорлик Кевин Москуера ўртасидаги баҳс рақибнинг вазн меъёрларини бажара олмагани сабаб ўтказилмади ва Абдумалик жангсиз ғолиб деб топилди. Эндиликда у кейинги босқичда Испания ёки Эсватини боксчиларидан бирига қарши рингга кўтарилади.

Шунингдек, вазни -54 кг бўлган чарм қўлқоп усталари орасида иштирок этаётган Асилбек Жалилов туркиялик Садаи Ахскалига қарши жанг ўтказиб, 5:0 ҳисобида ғалаба қозонди.

Жавоҳир Тошхўжаев, ЎзА