Зеленский ва Трамп урушни тўхтатиш масаласини муҳокама қилди (+видео)
Украина президенти Владимир Зеленский ўзининг Telegram саҳифасида маълум қилишича, у АҚШ президенти Дональд Трамп билан телефон орқали суҳбат ўтказди. Суҳбат давомида Украина ва Россия ўртасидаги музокара жараёнлари муҳокама қилинган, дея хабар берди DW нашри.
Зеленскийнинг айтишича, 26 февраль куни Женевада ўтадиган икки томонлама учрашув ва март ойида режалаштирилган Украина, Россия ва АҚШ вакиллари иштирокидаги уч томонлама музокараларга тайёргарлик масалалари кўриб чиқилган. Унинг сўзларига кўра, суҳбатда АҚШ томонидан Трампнинг музокарачилари бўлмиш Стив Уиткофф ва Жаред Кушнер ҳам қатнашган.
Reuters агентлиги маълумотига кўра, бу Европа ҳудудида Владимир Путин ва Дональд Трамп вакиллари ўртасида бир ҳафта ичидаги иккинчи учрашув бўлади. 23 февраль куни ҳам Женевада музокаралар ўтказилган, унда ядровий қуролларни назорат қилиш бўйича шартнома масаласи кўриб чиқилган.
Украина ва Россия ўртасида АҚШ воситачилигида музокаралар 23 январдан буён давом этмоқда. Аммо, ҳозирча тинчлик йўлида аниқ натижага эришилмаган.
Энг баҳсли масалалардан бири – Россиянинг Донбасс ҳудудлари бўйича талабларидир. Москва назоратига ўтмаган ҳудудларни ҳам Россияга топширишни талаб қилмоқда, Киев эса буни рад этаётир, аммо, шундай бўлсада муайян муросага тайёр эканини билдирган.
Яна бир муҳим масала Запорожье АЭС тақдири. Станция 2022 йил март ойида Россия қўшинлари томонидан эгалланган. Украина уни ўз назоратига қайтаришни талаб қилмоқда. Россия эса ҳатто АЭС бошқарувини АҚШга топшириш вариантини ҳам рад этгани айтилмоқда.
Европадаги энг йирик атом электр станцияси ҳисобланган мазкур объект атрофидаги вазият ҳануз хавотирли бўлиб қолмоқда. Халқаро ҳамжамият у ерда ҳарбий ҳаракатларни тўхтатишга чақириб келади.
<iframe width="650" height="420" src="https://www.youtube.com/embed/QXpf-jm3Auc" title="Zelenskiy va Tramp urushni to`xtatish masalasini muhokama qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
