Өзбекстан стратегиялық маңызы бар минералдар саласындағы халықаралық ынтымақтастықты кеңейтуде
Өзбекстан технологиялық металдар комбинаты әлемдегі ең ірі тау-кен және металлургия холдингтерінің бірі саналатын «Shaanxi Non-ferrous Metals Holding Group» корпорациясымен ынтымақтастық туралы меморандумға қол қойды.
Мәліметке сәйкес, «Shaanxi Non-ferrous Metals Holding Group» молибден, титан, түсті металдар, геология, инжиниринг және толық өнеркәсіптік тізбек бағыттары бойынша жаһандық деңгейдегі жетекші корпорациялардың бірі болып саналады.
Қазіргі таңда холдинг құрамында 30-дан астам кәсіпорын мен ұйым жұмыс істейді. Онда 40 мыңнан астам маман еңбек етеді. Корпорация геологиялық барлау, кен орындарын игеру, пайдалы қазбаларды өндіру, байыту, металлургиялық қайта өңдеу, ғылыми-зерттеу, инжиниринг және жоғары қосылған құны бар өнімдер шығаруды қамтитын кешенді өнеркәсіптік жүйе қалыптастырған.
Холдинг құрамындағы «Jinduicheng Molybdenum» компаниясы әлемдегі ірі молибден өндірушілерінің бірі саналады. Сонымен қатар корпорация құрамына аэроғарыш өнеркәсібіне арналған титан мен титан қорытпаларын шығаратын «Baoti Group» компаниясы да кіреді. Бұл компания жаһандық титан индустриясындағы жетекші кәсіпорындардың бірі ретінде танылған.
Өзбекстан технологиялық металдар комбинаты мен «Shaanxi Non-ferrous Metals Holding Group» арасында қол қойылған меморандум геологиялық барлау жұмыстарын дамыту, стратегиялық маңызы бар минералдарды өндіру және терең өңдеу, озық технологиялар трансфері, ғылыми-зерттеу қызметін кеңейту, мамандар даярлау және перспективалы инвестициялық жобаларды жүзеге асыру бағыттарын қамтиды.
Аталған ынтымақтастық Өзбекстанның стратегиялық минералдар саласындағы әлеуетін арттыруға, халықаралық өндірістік байланыстарды нығайтуға және жоғары қосылған құны бар өнімдер өндірісін дамытуға ықпал етеді.
