– Қрим кўп йиллар олдин бой берилган, яъни бугун муҳокама қилинадиган мавзу эмас, – деди Дональд Трамп. – Зеленский урушни давом эттирса, бутун мамлакатни йўқотиши мумкин. Бу фикр Владимир Зеленскийнинг “Украина Қрим эгалланишини қонуний, деб тан олмайди” мазмунидаги сўзларига муносабат ўлароқ янграган.

– Ушбу баёнот Россия билан олиб борилаётган тинчлик музокараси натижасига жиддий салбий таъсир кўрсатади, чунки Қрим анча олдин, Барак Обама даврида йўқотилган, – деди Америка етакчиси. – Ҳеч ким Қримни Россия ҳудуди сифатида тан олишни талаб этаётгани йўқ. Қримни қайтариб олиш учун нега 11 йил олдин курашилмади? Иғвогарона баёнотлар урушни тугатишга қаратилган мулоқотни қийинлаштиради. У тинчликни танлаши керак. Биз келишувга жуда яқинмиз, Зеленский ҳам айни жараёнга қўшилишини истаймиз.

Хабарингиз бор, 23 апрель куни Лондонда Буюк Британия, Франция, Германия ва Украина вакиллари иштирокида Россия билан зиддиятни тартибга солишга қаратилган халқаро маслаҳатлашув якунланди. Дастлаб учрашувда АҚШ дипломатлари ҳам қатнашиши режалаштирилганди, бироқ давлат котиби Марко Рубио тадбирдан бир кун олдин, Зеленскийнинг Қрим ҳақидаги баёноти ортидан Лондонга сафарини бекор қилди.

– Бу бизнинг еримиз, халқимиз ҳудуди, – деган Украина раҳбари брифингда. – Айни масалада бирор тушунарсиз ёки муҳокама қилинадиган ҳеч нима йўқ.

Лондондаги муҳокамада қатнашган Украина делегацияси раҳбари Андрей Ермак айтишича, йиғилиш иштирокчилари “Трампнинг тинчлик йўлидаги саъй-ҳаракатига содиқликлари”ни билдиришган.

– Урушни тезроқ тўхтатишни истаб, бизни қўллаб-қувватлаётганликлари учун ҳамкорларимиздан миннатдормиз, – деб ёзган мулозим ижтимоий тармоқдаги саҳифасида.

К.Бекжонов, ЎзА