Трамп: Канада бизни йиллар давомида алдаб келди (+видео)
АҚШ президенти Дональд Трамп Канадада ишлаб чиқарилган товарларни АҚШнинг давлат харидлари тизимидан чиқариш бўйича топшириқ берганини маълум қилди. У Канадани америкалик компаниялар ва фермерлар учун адолатли савдо шароитларини таъминламаётганликда айблади, деб хабар берди Anadolu агентлиги.
Трампнинг таъкидлашича, АҚШдаги сут маҳсулотлари ишлаб чиқарувчиларига ўз маҳсулотларини Канада бозорида сотишга рухсат берилмаяпти. Шу билан бирга, Канада АҚШнинг аввалги президентлари даврида тузилган савдо келишувлари туфайли Америка бозорида, жумладан автомобиль соҳасида фаолият юритиш имкониятига эга.
«Канада бизни йиллар давомида алдаб келди. Аммо кўпчилик шуни билмайдики, Канада ҳукумати АҚШнинг кичик бизнес ва компанияларига давлат харидлари бозорида ўз маҳсулотларини сотишни тақиқлаган»,— деб ёзди Трамп.
«Бу ўзаро ҳамкорлик эмас, балки Канаданинг савдо найрангидир. Бундан кейин кириш имкониятларига чек қўямиз», — деди АҚШ президенти. У Канаданинг АҚШдаги улкан давлат харидлари бозорига кенг кириш имконияти борлигига эътибор қаратди.
Трамп АҚШнинг Умумий хизматлар бошқармаси ва АҚШ Савдо вакили идорасига Канадада ишлаб чиқарилган товарларни давлат харидлари дастурларидан чиқаришни топширган.
Бу чора Канада америкалик фермерлар ва компанияларга нисбатан адолат тамойилларига тўлиқ амал қилишни таъминлагунга қадар амал қилиши айтилган. Трампнинг таъкидлашича, ушбу давлат харидлари дастурларининг йиллик ҳажми 50 миллиард доллардан ошади.
«Буни кўп йиллар олдин тўхтатиш керак эди», — дея қўшимча қилган Трамп.
<iframe width="650" height="420" src="https://www.youtube.com/embed/3z3E4uUcfFA" title="Tramp: Kanada bizni yillar davomida aldab keldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
