“The Korea Herald” нашри Шавкат Мирзиёев интервьюсини эълон қилинди
Ўзбекистон Республикаси Президенти Шавкат Мирзиёевнинг Жанубий Корея етакчи нашри “The Korea Herald”га берган интервьюси эълон қилинди.
Давлатимиз раҳбари Жанубий Кореяга давлат ташрифи арафасидаги интервьюсида Ўзбекистон – Корея муносабатларининг бугунги ҳолати ва истиқболи, юқори технологиялар, инвестиция, инсон капитали ҳамда минтақавий ҳамкорлик масаласи ҳақида фикр билдирди.
Президентнинг таъкидлашича, сўнгги йилларда икки мамлакат ўртасидаги савдо ҳажми беш баробар ошди, Кореянинг Ўзбекистон иқтисодиётига киритган жами инвестициялари 8 миллиард доллардан зиёдни ташкил этди. Бугунги кунда икки давлат иштирокида 700 дан ортиқ қўшма корхона ва лойиҳа амалга оширилмоқда.
Интервьюда сунъий интеллект, муҳим минераллар ва ярим ўтказгичлар, робототехника, электр транспорти, биофармацевтика, замонавий кимё, “ақлли” қишлоқ хўжалиги ва шаҳарлар келгуси ҳамкорлик истиқболли йўналиши сифатида қайд этилди.
Президент Шавкат Мирзиёев икки мамлакат ҳамкорлигини алоҳида тармоқ доирасидан қўшма ишлаб чиқариш тизимлари, технологик платформалар ва янги бозорларни шакллантириш босқичига олиб чиқиш муҳимлигини таъкидлаган. Ўзбекистон етакчисига кўра, бу икки мамлакатга “тараққиётда биргаликда янги сакраш”га эришиш имконини беради.
Шунингдек, интервьюда Марказий Осиё ва Корея ўртасидаги ҳамкорлик истиқболларига ҳам эътибор қаратилган. Президент Шавкат Мирзиёев бўлажак биринчи “Корея – Марказий Осиё” саммитини стратегик шерикликнинг янги босқичи учун муҳим бошланиш нуқтаси сифатида баҳолади ва инвестициявий ҳамкорлик бўйича муҳим келишувларга эришишга умид билдирди.
Интервьюнинг тўлиқ матни билан “The Korea Herald” нашрида танишинг.
Д.ҲАКИМОВ,
ЎзА
