Ташкент халықаралық әуежайында ұшу қауіпсіздігін қамтамасыз ететін интеллектуалды жүйе енгізілді

Бұл жүйе жасанды интеллекттің көмегімен қауіпті аймақтардағы құстарды автоматты түрде анықтау, бақылау және үркіту функцияларын орындай отырып, адам факторын едәуір азайтады. Жүйе толықтай автономды түрде жұмыс істеп, әуе кемелерінің қозғалысына қарай өздігінен іске қосылып, сөнеді.

Арнайы камералары құстарды күндіз 1000 метрге дейін, түнде 400 метрге дейінгі қашықтықтан анықтай алады және күрделі ауа райы жағдайларында да дер кезінде әрекет етуге мүмкіндік береді. Құстарды үркіту үшін бағытталған дыбыстық және ультрадыбыстық сигналдар қолданылады.

Құстар бұл әсерге үйреніп кетпеуі үшін сигналдар үнемі өзгертіліп отырады. Сонымен қатар, қашықтық пен қоршаған ортаға байланысты дыбыс деңгейі реттеліп, экожүйеге келетін ықтимал зиян барынша азайтылады.

Аталған жүйе бір мезетте 256-ға дейін құсты анықтап, оларды бақылауға қабілетті. Бірнеше құрылғының үйлесімді жұмысы арқылы құстар қауіпсіз аймақтарға бағытталады.

Сондай-ақ жүйе мамандарға талдау жасап, басқаруды жеңілдету үшін барлық деректерді үздіксіз жинақтап отырады.