Ўқишга кира олмаган абитуриентлар орасида супер-контракт масаласига оид саволлар кўпаймоқда. Қуйида энг муҳим ва долзарб маълумотлар содда ва тушунарли қилиб жамланган.
2025 йил учун супер-контракт тартиби ва нархлари ҳали расман тасдиқланмаган. Қарор қабул қилингач, қўшимча маълумотлар эълон қилинади. Ҳозирда супер-контракт учун аризалар қабул қилинмаяпти. Аризалар одатда сентябрь ойида онлайн тарзда топширилади.
2024 йил тартибига кўра, супер-контракт нархи абитуриентга неча балл етмаганига қараб белгиланади:
- Ўтиш балига 0,01 дан 1 баллгача етмаганлар – контрактнинг 1,5 баробари
- 1,01 дан 2 баллгача етмаганлар – 2 баробари
- 2,01 дан 3 баллгача етмаганлар – 2,5 баробари
- 3,01 дан 4 баллгача етмаганлар – 3 баробари
Супер-контракт фақат биринчи курс учун тўланади. Иккинчи курсдан бошлаб оддий контракт асосида ўқиш давом эттирилади.
Ариза топшириш учун олий таълим муассасасига бориш шарт эмас. Барча жараён онлайн амалга оширилади.
Абитуриентларнинг баллари асосида саралаш амалга оширилади.
Агар абитуриент тестда ўқишга кира олган бўлса, лекин бошқа йўналишда ўқишни истаса, супер-контракт орқали фақат ўзи танлаган биринчи йўналишида ўқишга рухсат берилади. Ўқишга кира олмаганларга эса ўтган йили исталган бешта йўналишдан бирини танлаб, супер-контракт асосида ўқиш ҳуқуқи берилган эди. Бу йилги тартиб ҳали тасдиқланмаган.
Супер-контракт учун давлат томонидан таълим кредити ажратилмайди. Бироқ айрим банклар оддий тижорат кредитларини таклиф қилиши мумкин. Иккинчи курсдан бошлаб эса оддий контракт асосида ўқий бошлаган талабаларга таълим кредити олиш имконияти мавжуд.
Супер-контракт асосида ўқиётган талабалар биринчи курсда яхши ўқиса, кейинги йилларда давлат гранти асосида ўқиш учун даъвогарлик қилиши мумкин. Супер-контрактни тўрт қисмга бўлиб тўлаш мумкин. 15 октябргача тўловни тўлиқ амалга оширганларга эса 10 фоиз чегирма берилади.
Агар абитуриент 56,7 баллдан кам балл тўплаган бўлса, у ҳолда супер-контрактнинг икки карра тўловини амалга ошириши керак бўлади. Масалан, ўтган йили молия йўналишида оддий контракт нархи 91 миллион сўм бўлган бўлса, 56,7 баллдан кам олган абитуриентлар камида 182 миллион сўм тўлашган.
Агар абитуриент 54 балл олган бўлса-ю, ўтиш бали 57 балл бўлса, у 3 балл етказмаган ҳисобланади. Лекин бу ерда муҳим жиҳат — у 56,7 баллдан кам балл тўплаган, шунинг учун унга 3 баробар эмас, икки карра супер-контракт тўлови қўлланилади. Бу ерда фарқ қанча балл етмаганида эмас, 56,7 баллдан юқори ёки паст бўлганида.
2025 йилда супер-контракт тўловларининг арзонлашиши кутилмоқда. Президент раислигида ўтказилган йиғилишда ректорларга супер-контракт суммаларини табақалаштириб белгилаш ваколати берилди. Бу эса 4 баллдан ортиқ етказмаганлар учун ҳам алоҳида ставкалар белгиланиши мумкинлигини англатади. Масалан, 10 ёки 20 балл етмаганлар учун ҳам мос равишда бошқа нархлар белгиланиши мумкин.
Хулоса қилиб айтганда, 2025 йилда супер-контракт тизимида кўплаб янгиликлар бўлиши кутилмоқда. Расмий эълонлар чиққач, барча янгиликлар ҳақида сизни хабардор қилиб борамиз. Бизни кузатишда давом этинг.
<iframe width="650" height="420" src="https://www.youtube.com/embed/H1B_IkQDi_Q" title="Super-kontrakt haqida eng muhim ma’lumotlar" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Фардона Яхшибоева, Улуғбек Тўхтаев, ЎзА