Стол тенниси: "Pro-Тur-3" мусобақасида жамоалар ғолиблик учун курашмоқда
Пойтахтимизда стол тенниси бўйича профессионал спорт клублари ўртасида давом этаётган "Pro-Tur-3" мусобақаларида иштирокчи жамоалар ва халқаро рейтинг кўрсаткичига эга чет эллик спортчилар сони сезиларли даражада ошгани ўйинлар давомида яққол кўзга ташланди.
"Pro-Tur" мусобақаларининг иккинчи босқич баҳсларида 12 та жамоа иштирок этган бўлса, эндиликда улар сони 17 тага етди. Шунингдек, ушбу жамоаларда стол тенниси ривожланган хорижий давлатларнинг ТОП-20 рейтингига кирувчи спортчилар сони ҳам ошгани эътиборли.
Ушбу кўрсаткичлар Ўзбекистонда стол теннисига бўлган қизиқиш ва ишонч ортиб бораётганини, шу билан бирга мамлакатимизнинг халқаро спорт майдонидаги нуфузи мустаҳкамланаётганини яққол намоён этмоқда.
Куни кеча гуруҳ босқичи ўйинлари якунланиб, 8 та жамоа плей-офф босқичига йўл олди.
Бугун, 31 март куни “M.G.HVANA”, “SULTONOV CLUB”, “Uzgeo Club”, “MAROQAND”, “Orient”, “KSYUSHA-KATYUSHA”, “DO‘STLIK CHEMPION”, “UNITED CLUB” жамоалари ўртасида икки тизим асосида ўтказиладиган мусобақалар давомида "Pro-Tur-3"нинг ғолиб ва совриндор жамоалари аниқланади.
Эслатиб ўтамиз, мукофот жамғармаси 100 миллион сўм этиб белгиланган турнирда 1-ўринни эгаллаган жамоа 50 миллион, 2-ўрин соҳиби 25 миллион ва 3-ўриндан жой олган 2 та жамоа 12 миллион 500 минг сўм пул мукофоти билан тақдирланади.
Т.Рўзиев,
ЎзА
