Россия Президенти Владимир Путин Украинада 30 кунлик ўт очишни тўхтатиш ғоясига қўшилиши, бироқ сулҳ мазмунига оид “саволлар” сақланиб қолаётганини билдирди. BBC шундай ёзган.
Украина Президенти Владимир Зеленский Путиннинг режага жавобини “манипуляция” дея баҳолади ва РФга қарши санкцияни кучайтиришга чақирди.
Ўз навбатида АҚШ Россиянинг нефть, газ ва банк секторига нисбатан қўшимча санкция киритди.
Кеча Москвада ўтказилган матбуот анжуманида Путин ўт очишни тўхтатиш таклифига қуйидагича изоҳ берди:
– Ғоя тўғри, биз бу фикрни қўллаб-қувватлаймиз. Бинобарин, муҳокама қилишимиз керак бўлган масалалар бор. Ўт очишни тўхтатиш барқарор тинчликка олиб келиши ва инқирознинг асосий сабабини очиб бериши зарур. Америкалик ҳамкасблар ва ҳамкорлар билан музокара олиб боришимиз керак.
Балки, Трампга қўнғироқ қиларман. Украина томони учун 30 кунлик тинчликка эришиш яхши. Биз бунинг тарафдоримиз, аммо баъзи тушунарсиз жиҳатлар бор.
РФ етакчиси таъкидлашича, мунозарали масалалардан бири – Курск вилояти. Россия мазкур ҳудуд устидан тўлиқ назорат ўрнатган, Украина қўшини иҳоталанган.
– Улар кетишга ҳаракат қиляпти, лекин вазият назоратимизда, – деган у. – Украина аслаҳалари ҳам бизнинг қўлимизда. Курскдаги украиналиклар учун икки йўл бор – таслим бўлиш ёки жон таслим қилиш.
Путин ўт очишни тўхтатиш келишуви қандай ишлашига оид баъзи масалаларга ҳам тўхталган:
–30 кундан қандай фойдаланилади? Украинани қайтадан сафарбар қилиш, қайта қуроллантириш учунми? Мақсад одамларни ҳарбий тайёргарликдан ўтказишми? Ким жангни тугатиш буйруғини беради? Нима эвазига? 2000 километрдан ортиқ масофани босиб ўтиш имконини берган сулҳни ким бузди? Бу саволлар ҳар икки томон пухта ишлашини тақозо қилади.
Зеленский ҳам тунги видео мурожаатида мавзуга оид фикр билдирди:
– Путин тўғридан-тўғри йўқ демайди, лекин амалда таклифни рад этишга тайёрланмоқда. Шубҳасиз, у Трампга урушни давом эттирмоқчилигини тўғридан-тўғри айтишдан қўрқади. Россия раҳбари шунчалик кўп шарт қўядики, натижада ҳеч нарса амалга ошмайди.
Путин ва Зеленский баёнотидан сўнг икки томоннинг вазиятга ёндашуви бир-бирига зид экани маълум бўлди.
Украина икки босқичли жараённи истайди: тезда ўт очишни тўхтатиш ва кейинроқ узоқ муддатли келишувга эришиш. РФ эса барча масала бирдан ҳал қилиниши тарафдори.
Қайд этиш жоиз, Россия 2022 йил февралда кенг кўламли ҳарбий амалиёт бошлаб, ҳозир Украина ҳудудининг тахминан 20 фоизини назорат қилмоқда.
Мусулмон Зиё, ЎзА