Россия ЕИ санкциясига кескин жавоб бермоқчи
Европа Иттифоқи томонидан эълон қилинган навбатдаги чеклов чораларига жавобан, Россия Европа институтлари ва аъзо давлатларнинг қатор расмийларига мамлакатга киришни тақиқлаб, "қора рўйхат"ни кенгайтирди. Бу қадам халқаро кескинликни янги босқичга олиб чиқмоқда.
РФ Ташқи ишлар вазирлиги Россияга кириши тақиқланган шахслар рўйхатини сезиларли даражада кенгайтирганини маълум қилди. Ушбу “қора рўйхат”дан “Украинани қурол-яроқ билан таъминлашда иштирок этган, русларга қарши сиёсат юритаётган расмий мулозимлар” жой олган. Баёнотда таъкидланишича, айни чора РФнинг ҳудудий яхлитлигини бузишга қаратилган ҳаракат ва Украинага кўрсатилаётган ҳарбий ёрдамга бевосита жавобдир. Шу билан бирга Европа Кенгаши томонидан яқинда қабул қилинган 20-санкция тўплами банк тизими, крипто валюта ва жами 930 миллион евродан ортиқ қийматдаги экспорт-импорт амалиётига, жумладан металл ва муҳим минераллар савдосига таъсир кўрсатиши айтилмоқда.
Рус дипломатик доиралари “кўҳна қитъанинг бундай бир томонлама босим ўтказишга уриниши”ни самарасиз, дея баҳолаб, ҳар қандай чекловга мутаносиб равишда жавоб қайтарилишини билдирган. Хусусан, ТИВ расмий вакили Мария Захарова ЕИнинг навбатдаги санкция ҳақидаги баёнотини “бемаънилик театри” деб атаб, кескин танқид остига олди. Халқаро майдонда эса АҚШнинг янги маъмурияти ва Дональд Трамп туфайли Владимир Зеленскийнинг кейинги тақдири ЕИ учун хавотирли муҳокама мавзусига айланган.
Ф.Яхшибоева, ЎзА
