Ресми Сеул Ресей мұнайына қатысты санкцияның жұмсарғанын растады
Ресми Сеул жаһандық жанармай дағдарысы күшейіп тұрған кезеңде белгілі бір шарттар негізінде АҚШ енгізген шектеулердің жеңілдетілуіне байланысты Ресейден кейбір энергия ресурстарын импорттауға рұқсат алғанын растады.
Оңтүстік Кореяның Сауда, өнеркәсіп және ресурстар министрлігі өкілінің айтуынша, АҚШ бұған дейін Ресейдің шикі мұнайы мен мұнай өнімдеріне қатысты шектеулердің уақытша жеңілдетілгенін мәлімдеген.
Сондай-ақ Сеул билігі бұл мәселенің егжей-тегжейін нақтылау үшін Вашингтонмен кеңес жүргізгені айтылған. Өйткені аталған шара төңірегінде әлі де «белгісіздік пен алаңдаушылық» сақталып отыр.
Ресми тұлғаның сөзінше, жүргізілген келіссөздер Оңтүстік Кореяның ресейлік энергия өнімдерін сатып алу мүмкіндігі бар екенін көрсетеді.
