Қуёш ва шамол энергетикаси қувватлари 5,5 гигаваттдан ошди (+видео)
Бугунги кунда энергетика соҳаси мамлакатимиз учун стратегик йўналишга айланиб, ушбу тизимда кенг кўламли ислоҳотлар изчил давом этмоқда.
Президентимиз Шавкат Мирзиёев раҳбарлигида соҳага хусусий инвестициялар учун кенг йўл очилди, давлат-хусусий шериклик механизмлари жорий этилди ҳамда шаффоф инвестиция муҳити шакллантирилди.
Натижада сўнгги йилларда энергетика соҳасига қарийб 35 миллиард АҚШ доллари миқдорида тўғридан-тўғри инвестиция жалб қилинди. 9 гигаватт янги қувватлар ишга туширилди. Умумий генерация қуввати 25,8 гигаваттга етди, электр энергияси ишлаб чиқариш ҳажми эса 60 миллиарддан 85 миллиард киловатт соатга ошди.
Шу билан бирга, “яшил” энергетика ҳам жадал ривожланмоқда. Қуёш ва шамол энергетикаси қувватлари 5,5 гигаваттдан ошди, тоза энергия улуши 30 фоизга етди. Аҳоли ва бизнес объектларида 2 гигаваттдан ортиқ қуёш панеллари ўрнатилди.
Жорий йилнинг 12-14 май кунлари пойтахтимиздаги “CAEx Uzbekistan” халқаро кўргазмалар мажмуасида ўтказилган Ўзбекистон энергетика ҳафталигида ҳам айнан шу масалалар муҳокама қилинди.
Иштирокчилар соҳадаги долзарб масалалар, жумладан, энергетика хавфсизлигини таъминлаш, ресурслардан самарали фойдаланиш, қайта тикланувчи энергия манбаларини кенг жорий этиш ҳамда экологик барқарорликни кучайтириш масалаларини атрофлича муҳокама қилди.
Форум ва мулоқотлар давомида энергетика соҳасини янада модернизация қилиш, “яшил” иқтисодиёт тамойилларини кенг жорий этиш, инновацион технологиялар асосида тармоқ самарадорлигини ошириш ҳамда халқаро ҳамкорликни мустаҳкамлаш устувор вазифа сифатида қайд этилди.
<iframe width="640" height="420" src="https://www.youtube.com/embed/Woqc5ECraTQ" title="Quyosh va shamol energetikasi quvvatlari 5,5 gigavattdan oshdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Насиба Зиёдуллаева,
Ёқуб Мелибоев, Анвархўжа Аҳмедов (видео-монтаж),ЎзА
