Европа космик агентлиги (ЭСА) Қуёшнинг юқори фаоллиги даврида Ер атрофидаги технологик тизимларга таъсирини ўрганиш мақсадида махсус астрономик тажриба ўтказди.

Ушбу тадқиқот Қуёш тутилишини сунъий равишда моделлаштириш орқали амалга оширилди ва тарихда биринчи марта шу даражада аниқ синов натижалари қайд этилди.

ЭСАнинг Проба-3 деб номланган миссияси доирасида икки сунъий йўлдош бир вақтнинг ўзида фазода жуда яқин — атиги 150 метр масофада — учиб ўтди. Энг эътиборга молик жиҳати шундаки, ушбу йўлдошлар бир неча соат давомида ўз позицияларини миллиметргача бўлган аниқликда сақлаб туришга муваффақ бўлди.

2025 йил март ойида ўтказилган бу тажриба Қуёш тутилишини имитация қилиш орқали Қуёш нурланиши ва магнит бўронларининг Ер орбитасидаги қурилмаларга бўлган салбий таъсирини синчковлик билан ўрганиш имконини берди. Бу каби сунъий тутилишлар илм-фан учун муҳим бўлиб, нафақат космик технологияларни синовдан ўтказиш, балки келажакдаги реал ҳодисаларга тайёр туриш имконини ҳам беради.

ЭСА вакилларининг таъкидлашича, бундай миссиялар орқали келажакда сунъий йўлдошларнинг ишончлилиги оширилади, шунингдек, фавқулодда вазиятларда улар қандай ҳаракат қилишини олдиндан баҳолаш мумкин бўлади.

<iframe width="791" height="445" src="https://www.youtube.com/embed/pkOyNUB1tG4" title="Quyosh tutilishi sunʼiy yoʻldoshlar yordamida modellashtirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов (видео), ЎзА