Қурилиш cоҳасида фуқароларни қийнаётган мурожаатлар кўп
Фуқаролардан келадиган ҳар бир мурожаат шунчаки ариза ёки шикоят эмас. Унинг ортида ҳал этилиши зарур бўлган муаммо, баъзан эса ойлар давомида жавоб топмаган савол туради. Айниқса, уй-жой, қурилиш сифати, коммунал хизматлар ва ичимлик суви таъминоти билан боғлиқ масалалар аҳоли ҳаётига бевосита дахлдор.
Қурилиш ва уй-жой коммунал хўжалиги соҳасида назорат қилиш инспекцияси томонидан жорий йилнинг январь–октябрь ойларида аҳолидан келиб тушган мурожаатларни ўрганиш ва уларда кўтарилган муаммоларни ҳал этиш бўйича муайян ишлар амалга оширилди. Ҳисобот даврида Инспекцияга жами 7 минг 225 та мурожаат келиб тушган. Уларнинг мазмуни таҳлил қилинганда, энг кўп мурожаат қурилиш соҳасига тегишли экани маълум бўлди.
Мурожаатларнинг аксарияти қурилиш ишлари, коммунал хизматлар ва бошқарув сервис компаниялари фаолияти, ичимлик суви таъминоти ҳамда оқова сувларни чиқариб юбориш масалалари билан боғлиқ. Соҳада мурожаатларнинг кўплиги эса аҳоли учун уй-жой қурилиши сифати, кўп квартирали уйларни бошқариш ва коммунал хизматлар барқарорлиги қанчалик муҳимлигини ҳам кўрсатади.
Келиб тушган мурожаатларнинг 2 минг 244 таси ижобий ҳал этилган. 4 минг 670 таси бўйича фуқароларга ҳуқуқий тушунтиришлар берилган, 311 таси эса ваколатлилиги бўйича бошқа ташкилотларга юборилган. Шунингдек, фуқаролар билан бевосита мулоқот қилиш ва уларни қийнаётган масалаларни жойига чиққан ҳолда ўрганиш мақсадида ҳудудларда 13 та сайёр қабул ташкил этилган. Уларда жами 460 та юридик ва жисмоний шахснинг мурожаати кўриб чиқилган. Натижада 289 та масала ижобий ҳал этилган. 148 та мурожаат юзасидан ҳуқуқий тушунтиришлар берилган, 23 таси эса тегишли ташкилотларга йўналтирилган.
Маълумот ўрнида таъкидлаш лозимки, 2026 йилнинг январь–сентябрь ойларида Ўзбекистонда 339,3 триллион сўмлик қурилиш ишлари бажарилган. Бу кўрсаткич 2025 йилнинг мос даврига нисбатан 12,3 фоизга ошган.
Муҳайё Тошқораева,
ЎзА
