O‘zgarishlar ko‘chalardan boshlanadi
Jizzax viloyatining Arnasoy tumanida mahallalar infratuzilmasini yaxshilash, aholi uchun qulay va xavfsiz muhit yaratishga qaratilgan ishlar izchil davom etmoqda.
Mahalla — insonning kundalik hayoti kechadigan, uning qulayligi va farovonligi bevosita seziladigan muhit. Shu bois bugun hududlarda amalga oshirilayotgan bunyodkorlik ishlariga ko‘cha va yo‘llarni tartibga keltirish, piyodalar harakati uchun qulaylik yaratish, muhandislik infratuzilmasini yaxshilash kabi muhim vazifalar uyg‘unligi sifatida qaralmoqda.
Arnasoy tumanidagi mahallalarda barpo etilayotgan piyodalar yo‘laklari ana shu ehtiyojning amaliy ifodasidir. Lotoklar yotqizilishi esa hududlardagi obodonlik va infratuzilma barqarorligini ta’minlashga xizmat qiladi. Oddiy ko‘ringan bu ishlar aslida aholining har kuni foydalanadigan muhitini yanada qulaylashtirishga qaratilgan.
[gallery-31258]
Muhimi, davlat dasturlarida belgilanayotgan vazifalarning hayotdagi natijasi avvalo mahalla ko‘chalari, yo‘laklari, obod hududlari va aholi uchun yaratilayotgan qulayliklarda namoyon bo‘ladi. Arnasoydagi ishlar ham ana shu ezgu maqsadning bir bo‘lagi sifatida aholi turmushiga yaqinligi bilan ahamiyatli.
Tumanda amalga oshirilayotgan ishlarni o‘rganish jarayonida tuman hokimi Odil Musanov qurilish va obodonlashtirish ishlarining sifatiga alohida e’tibor qaratdi. Ob’ektlarni belgilangan talablar asosida barpo etish, har bir ishning pirovard natijasi aholi manfaatiga xizmat qilishi va jarayonni nazoratda ushlash yuzasidan mas’ullarga tegishli ko‘rsatmalar berildi.
Zero, obodlikning qiymati uning faqat ko‘rkamligi bilangina emas, odamlarga yaratgan qulayligi bilan ham o‘lchanadi. Mustahkam yo‘lak, tartibli hudud, puxta tashkil etilgan infratuzilma — bularning barchasi mahalladagi hayot sifatiga ta’sir etuvchi muhim omillardir.
Arnasoydagi bunyodkorlik ishlarining mazmuni ham shunda: mahalla qiyofasini yangilash orqali inson uchun yanada qulay, xavfsiz va munosib hayot muhitini shakllantirish. Bu esa islohotlarning odamlar hayotidagi eng yaqin va ko‘rinadigan natijasidir.
A. Qayumov, J. Yorbekov (surat), O‘zA muxbirlari
