Ўзбек футболининг энг ёрқин саҳифалари ҳали олдинда
Миллий терма жамоамизнинг жаҳон чемпионатидаги иштироки тўғрисида турли фикрлар билдирилмоқда. Лекин Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим.
Футболда ғалабалар ҳам, аламли мағлубиятлар ҳам бўлади. Аммо айрим натижалар борки, улар ўйин билан эмас, йиллар давомида бажарилган меҳнат билан баҳоланади.
Ўзбекистон миллий терма жамоаси илк бор жаҳон чемпионати йўлланмасини қўлга киритди ва Марказий Осиё тарихида бу маррага эришган биринчи давлат бўлди. Қолаверса, терма жамоамиз Мексика, АҚШ ва Канада давлатларида ўтказилаётган XXIII жаҳон чемпионатида МДҲга аъзо мамлакатлар орасида ягона иштирокчи давлат вакили сифатида иштирок этди. Бу тасодиф эмас, балки йиллар давомида шаклланган футбол тизими, ёшлар академиялари, мураббийлар ва футболчиларнинг машаққатли меҳнати самарасидир.
Жаҳон чемпионати эса якун эмас. Бу – дунёнинг энг кучли жамоалари билан ўйнаб, келажакдаги ғалабалар учун тажриба тўпланадиган майдон. Бугун Европа, Жанубий Америка ва Африка қитъаларида донг таратган жамоаларга қарши муносиб ўйнаган футболчиларимиз эртага янада кучлироқ бўлиб майдонга қайтишлари шубҳасиз.
Дунёнинг кўплаб кучли терма жамоалари ҳам илк мундиалини осон бошламаган. Аммо айнан ўша тажриба уларни кейинчалик футбол гигантларига айлантирган. Бунга 1998 йилда илк бор мундиалда қатнашиб, муваффақиятсизликка учраган, аммо бугунги кунда дунёнинг “топ” даражасига чиқаётган Япония терма жамоаси ёрқин мисол бўла олади.
Президентимиз алоҳида қайд этганидек, Ўзбекистон миллий терма жамоасининг жаҳон чемпионатидаги ўйинларини бутун халқимиз билан бир тану, бир жон бўлиб, катта ҳис-ҳаяжон билан кузатиб бордик. Футболчиларимиз “FIFA” рейтингида 5-ўринда турган, ўз вақтида Европа чемпионлигини қўлга киритган, Криштиану Роналдудек дунёнинг кўп карра энг яхши футболчиси бор Португалия ҳамда таснифда 13-ўринда бораётган, жаҳон чемпионларидан мунтазам очко тортиб келадиган Колумбия ҳамда кўплаб ўйинчилари Европанинг етакчи клубларида тўп сурадиган Конго Демократик Республикаси терма жамоалари билан ўтказилган ўйинлар орқали ўзига тажриба орттирди, мундиал нафасини ҳис қилди десак, тўғри бўлади.
Аббос Файзуллаев ва Элдор Шомуродов жаҳон чемпионатидаги илк голларини киритиб, халқимизга хурсандчилик бағишлади. Айниқса, Элдорнинг конголикларга киритган суперголи “FIFA” сўровномасида тенгсиз, деб топилди. Маҳоратли ҳужумчимиз бу борада аргентиналик Леонил Месси, француз Килиан Мбаппе ва бразилиялик Винисиус Жуниор каби донгдор “юлдуз”ларни ортда қолдиришга эришди.
Айни кунларда турли интернет сайтлари ва ижтимоий тармоқлардаги саҳифа ва каналларда Ўзбекистон миллий терма жамоасининг жаҳон чемпионатидаги натижаларидан фожиа ясаётган, футболчилар ва мураббийлар ҳақида нохолис фикрлар, ўринсиз танқидлар учраб турибди. Қизиғи шундаки, бу қарашлар спорт, хусусан, футбол соҳасини чуқур англамаган “диван экспертлари” томонидан билдирилмоқда. Бу ўз навбатида, терма жамоамизнинг биринчи рақамли мухлисининг назаридан четда қолмади:
“Миллий терма жамоамизнинг жаҳон чемпионатидаги иштироки тўғрисида турли фикрлар билдирилмоқда. Лекин Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим”, – деди давлатимиз раҳбари.
Дарҳақиқат, биз учун илк мундиалда қайд этилган натижалар қандай бўлганидан қатъи назар айни кунда йигитларимизга халқимизнинг руҳий далдаси ва қўллаб-қувватлови ҳар қачонгидан-да ғоят аҳамиятга эга. Терма жамоамиз учун катта ғалабалар ҳали олдинда. Шахсан, мамлакат раҳбари назорати остида футболни ривожлантиришга янада кенг шароитлар яратилади, бунинг учун инвестиция кўпайтирилади. Энг аввало, болалар футболига эътибор кучайтирилиб, миллионлар ўйини – спорт умуммиллий ҳаракатга айлантирилади.
Бизни мамнун этадиган жиҳати шундаки, миллий терма жамоамизни мусобақа давомида ҳам, мундиалдан кейин ҳам нафақат юртимиз аҳолиси, балки “Туркистон – умумий уйимиз” эзгу ғоясига бирлашган Марказий Осиё давлатлари ҳамда туркийзабон мамлакатларда якдиллик билан қўллаб-қувватланди.
2027 йилнинг январь ойида Саудия Арабистони яшил майдонларида футбол бўйича Осиё кубоги ўтказилади. Ушбу нуфузли мусобақага тайёргарлик ҳозирдан бошланади. Юртимиз етакчиси қайд этганидек, биз миллий терма жамоамизга ишонамиз ва қитъамиз биринчилигида ҳам бутун халқимиз билан қўллаб-қувватлаймиз. Демак, “ЖЧ-2026” биз учун ҳали бошланиши. Ўзбек футболининг энг ёрқин саҳифалари ҳали олдинда.
Оқилхон Дадабоев, ЎзА мухбири
