“Мустақиллик кубоги”: ярим финал иштирокчилари маълум бўлди

Пойтахтимизда Ўзбекистон Миллий ахборот агентлиги, Ўзбекистон футбол ассоциацияси ҳамда Ўзбекистон журналистлар уюшмаси ҳамкорлигида оммавий ахборот воситалари вакиллари ўртасида ўтказилаётган мини-футбол бўйича “Мустақиллик кубоги” мусобақасининг чорак финал баҳслари якунланди.

Мазкур босқичда қизиқарли ва муросасиз учрашувлар кузатилди. Хусусан, “O‘za” жамоаси “Ishonch gazetasi” устидан йирик — 4:0 ҳисобида ғалаба қозонди. “Renessans” жамоаси “Teleradio markazi”ни 1:0 ҳисобида мағлуб этган бўлса, “Sevimli TV” худди шу ҳисобда “Yangi O‘zbekiston”дан устун келди.

[gallery-29278]

Куннинг энг муросасиз учрашувларидан бири “MTRK” ҳамда “Futbol TV” жамоалари ўртасида кечди. Асосий вақт 1:1 ҳисобида якунланганидан сўнг ғолиб номи пенальтилар сериясида аниқланди. Унда “MTRK” жамоасига омад кулиб боқди.

Шу тариқа, “O‘za”, “Renessans”, “Sevimli TV” ҳамда “MTRK” жамоалари мусобақанинг ярим финал босқичига йўлланма олди. Мусобақанинг ярим финал, учинчи ўрин учун ҳамда финал учрашувлари 8 май куни бўлиб ўтади.

[gallery-29279]

Эслатиб ўтамиз, “Мустақиллик кубоги” ғолиби 25 миллион сўмлик мукофот пули билан тақдирланади. Шунингдек, иккинчи ва учинчи ўрин соҳибларига мос равишда 15 миллион ва 10 миллион сўмдан пул мукофоти топширилади.

Жавоҳир Тошхўжаев, Сарвар Ўрмонов, Носиржон Ҳайдаров (сурат), ЎзА