Мемлекет басшысы Бұхара мұнай өңдеу зауытын жаңғырту жобасымен танысты
Президент Шавкат Мирзиёев «Қоровулбозор» ауданындағы Бұхара мұнай өңдеу зауытына барып, кәсіпорынның жаңғырту жобасымен танысты.
Бұл зауыт Өзбекстандағы жанармай өнімдерін өндіретін ірі кәсіпорындардың бірі. Мұнда 3 200-ден астам маман еңбек етеді. Биылғы жылдың тоғыз айында жалпы құны 12,1 триллион сум болатын 1,36 миллион тонна мұнай өнімі өндірілді. Өнімдер мен қызметтер экспорты 99,5 миллион долларды құрады. Жыл соңына дейін бұл көрсеткішті 116 миллион долларға жеткізу жоспарланған.
Мемлекет басшысына таныстырылған жаңғырту жобасы шикізатты өңдеу көлемін арттырумен қатар, жоғары октанды бензин өндіру мүмкіндіктерін кеңейтуге бағытталған. Жобаның жалпы құны 328 миллион долларды құрайды.
Жоба аясында нафтаны гидротазалау және изомерлеу қондырғылары орнатылады. Гидротазалау барысында шикізат құрамындағы күкірт пен басқа да қоспалар азайтылады. Ал изомерлеу жеңіл фракциялардан алынатын бензиннің октан санын арттыруға мүмкіндік береді. Бұл технологиялық үдерістер Еуро-5 талаптарына сай келетін АИ-92 және АИ-95 маркалы бензин өндірісін ұлғайту үшін маңызды.
Жобада шикізатты фракцияларға бөлу және ауыр қалдықтарды терең өңдеу үдерістерін жетілдіру де көзделген. Нәтижесінде зауыттың жылдық өңдеу қуаты тағы 2,5 миллион тоннаға артып, жалпы қуаты 5 миллион тоннаға жетеді. Өңдеу көлемі мен дайын өнім өндірісінің ұлғаюы ішкі нарықты қамтамасыз етуді нығайтып, экспорт көлемін арттыруға мүмкіндік береді.
Мемлекет басшысы жаңғырту жұмыстарын белгіленген мерзімде әрі жоғары сапада аяқтау, жаңа қондырғыларды қолданыстағы өндірістік үдерістермен үйлестіре отырып іске қосу және кәсіпорынның тұрақты жұмысын қамтамасыз ету жөнінде тапсырмалар берді. Сондай-ақ жобаға қатысып жатқан шетелдік компаниялардың өкілдерімен әңгімелесті.
