Беларусь Республикасининг мамлакатимиздаги янги тайинланган Фавқулодда ва мухтор элчиси Александр Огородников Ўзбекистон ташқи ишлар вазири Бахтиёр Саидовга ишонч ёрлиғи нусхасини топширди.

Вазирлик ахборотига кўра, учрашув чоғида икки давлат ўртасидаги ҳамкорликнинг жорий ҳолати ва истиқболи муҳокама қилинган. Хусусан, савдо-иқтисодий ва гуманитар шерикликни янада мустаҳкамлаш, парламентлараро алоқани ривожлантириш ҳамда ҳудудлар ўртасидаги ҳамкорликни фаоллаштириш масалалари юзасидан фикр алмашилди.

Эслатиб ўтамиз, 2025 йил 14 январь куни Беларусь Президенти Александр Лукашенко саноат вазири биринчи ўринбосари Александр Огородниковни 2018 йилдан буён ишлаб келган Леонид Маринич ўрнига Ўзбекистондаги янги элчи этиб тайинлаш тўғрисида қарор қабул қилган эди.

Б.Худойбердиев, ЎзА