Коррупция – тараққиёт кушандаси
Ажиниёз номидаги Нукус давлат педагогика институтида коррупция ҳолатларининг олдини олиш, унинг салбий оқибатларини кенг жамоатчиликка тушунтириш, шунингдек, талаба-ёшлар орасида ҳалоллик ва қонунийлик тамойилларини мустаҳкамлаш мақсадида тарғибот учрашуви ташкил этилди.
Учрашувда Қорақалпоғистон Республикаси Вазирлар Кенгаши Комплаенс хизмати бош мутахассиси Н.Бердиниязова, Бош прокуратура ҳузуридаги Иқтисодий жиноятларга қарши курашиш департаменти Қорақалпоғистон Республикаси бошқармасининг жамоатчилик билан алоқалар ва ҳуқуқий ахборот бўлими инспектори А.Алламбергенов, институтнинг коррупцияга қарши курашиш “Комплаенс-назорат” тизимини бошқариш бўлими бошлиғи Ш.Шамуратов, шунингдек, талаба-ёшлар иштирок этди.
Тадбир давомида коррупция жамият ривожи, таълим сифати ҳамда фуқароларнинг давлат ва жамият институтларига бўлган ишончига салбий таъсир этувчи омиллардан бири эканлиги таъкидланди. Коррупцияга қарши курашишда тегишли ташкилотлар билан бирга ҳар бир фуқаронинг онги, масъулияти ва фаол фуқаролик позицияси муҳим аҳамият касб этади.
Таълим жараёнида шаффофликни таъминлаш, манфаатлар тўқнашувига йўл қўймаслик, порахўрлик ва бошқа коррупсион ҳолатларга муросасиз муносабатни шакллантириш – бугунги куннинг устувор вазифаларидан биридир.
Учрашувда талаба-ёшларга коррупцияга оид ҳуқуқбузарликларнинг ҳуқуқий оқибати, бундай ҳолатларга дуч келганда мурожаат қилиш тартиби ва коррупциянинг олдини олишда жамоатчилик назоратининг ўрни ҳақида тушунчалар берилди.
Довуд Абибуллаев,
ЎзА мухбири
