«Кейингиси биз бўламиз»: Россиялик депутат АҚШнинг Эрондан кейинги нишони Россия эканини айтди (+видео)
Россия Коммунистик партияси раиси Геннадий Зюганов АҚШнинг Яқин Шарқдаги ҳарбий ҳаракатлари Россияга ҳам таҳдид солишини таъкидлади, Эрон президенти Масъуд Пезешкиён эса урушни тугатиш учун компенсация ва хавфсизлик кафолатларини талаб қилди. Шу билан бирга, Италияда суд тизимида коррупция ва сиёсий гуруҳбозликни камайтириш мақсадида суд бошқарув кенгаши аъзолари лотерея орқали танланиши режалаштирилмоқда, Франция эса урушга қарши позицияси сабаб Россияда таъқибга учраган Алексей ва Мария Москалёвларга гуманитар ҳимоя тақдим этди. Молдова ҳукумати МДҲдан чиқишни маъқуллади, Норвегияда АҚШ элчихонаси ёнида содир бўлган портлашда уч ака-ука қўлга олинди, Хитойнинг Ушан туманида эса 905 метр узунликдаги янги Wushan Goddess Escalator ишга тушди, бу тоғли ҳудудларда аҳоли ҳаракатини сезиларли даражада осонлаштиради.
<iframe width="640" height="480" src="https://www.youtube.com/embed/dOK11EzWj2o?si=Z4XbmDyRQZ1wyd0p" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>«Кейингиси биз бўламиз»: Россиялик депутат АҚШнинг Эрондан кейинги нишони Россия эканини айтди
Россия Коммунистик партияси раиси Геннадий Зюганов Давлат думасидаги чиқишида Яқин Шарқдаги уруш АҚШнинг кенг стратегиясининг бир қисми эканини ва келажакда Россияга ҳам таҳдид солишини таъкидлади. У Форс кўрфазида содир бўлаётган воқеаларни «Америка империализмининг ниқоблари олиб ташланганини» кўрсатиши ва АҚШ сиёсатини «тажовузкорлик ва зўравонлик» деб аташини айтди. Зюгановнинг сўзларига кўра, Эрон ва АҚШ орасидаги ҳарбий ҳаракатлар минтақада сув ва озиқ-овқат таъминотига салбий таъсир қилмоқда.
Эрон президенти урушни тугатиш учун шарт қўйди
Эрон президенти Масъуд Пезешкиён урушни тугатиш учун мамлакат ҳуқуқларини тан олиш, компенсация тўлаш ва келажакдаги тажовузга қарши хавфсизлик кафолатларини беришни асосий шарт сифатида қўйди. У Х ижтимоий тармоғида Россия ва Покистон раҳбарларига минтақада тинчлик тарафдори эканини таъкидлаган ва АҚШ ҳамда Исроил бошлаган ҳарбий ҳаракатларни тўхтатишнинг ягона йўли шу шартларни бажариш эканини ёзди.
Италияда судьялар лотерея орқали танланади
Италия ҳукумати суд тизимидаги коррупция ва сиёсий гуруҳбозликни камайтириш мақсадида суд бошқарув кенгаши аъзоларини тасодифий танлаш — лотерея усули орқали аниқлашни режалаштирмоқда. Ушбу ислоҳот 22—23 март кунлари умумхалқ референдумига қўйилади. Мелони ислоҳотнинг учта асосий устуни — касбларни ажратиш, кенгашни иккига бўлиш ва интизомий суд ташкил этиш — эканини таъкидлади, энг баҳсли нуқта эса лотерея орқали аъзоларни танлашдир.
Франция Алексей ва Мария Москалёвларга ҳимоя тақдим этди
Россия фуқароси Алексей Москалёв ва унинг қизи Мария урушга қарши чизган расм ва ижтимоий тармоқлардаги изоҳлар сабаб Россияда таъқибга учрагач, Франция уларни гуманитар ҳимоя билан қабул қилди. Парижга келган Москалёвларга визалар ва хорижга чиқиш паспортисиз мамлакатга кириш ҳужжати берилди, Алексей икки йил колонияда қамалган, қиз эса васийликка топширилган.
Молдова ҳукумати мамлакатнинг МДҲдан чиқишини маъқуллади
Молдова ҳукумати 11 март куни мамлакатнинг Мустақил давлатлар ҳамдўстлиги (МДҲ) аъзолигига оид асосий келишувларни бекор қилишни қўллаб-қувватлади. Агар парламент ҳам тасдиқласа, қонун лойиҳаси президент Майя Сандуга имзолаш учун юборилади ва МДҲдан чиқиш жараёни бошланади. Ташқи ишлар вазири бу қадамни Европа йўналишини мустаҳкамлаш сифатида баҳолади.
Норвегияда АҚШ дипмиссияси ёнидаги терактда гумон қилинганлар қўлга олинди
Ослода асли ироқлик, аммо Норвегия фуқароси бўлган уч ака-ука 8 мартга ўтар кечаси АҚШ элчихонаси кириш қисми ёнида содир бўлган портлашда гумон қилиниб қўлга олинди. Полиция тергов олиб бораётиб, улар одамларни ўлдириш ёки катта зарар етказиш мақсадида кучли портловчи қурилмани ишлатган деб ҳисобламоқда, ФТБ ва Интерпол билан ҳамкорлик қилмоқда.
Хитойда қарийб 1 километрлик эскалатор ишга тушди
Хитойнинг Ушан туманида янги Wushan Goddess Escalator мажмуаси очилди, у аҳолини тоғли ҳудудларда осон ҳаракатланишини таъминлайди. Умумий узунлиги 905 метр бўлган эскалатор тизими 242 метр баландликка кўтарилади ва аввал бир соат давом этган пиёда йўлни йигирма дақиқага қисқартиради. Иншоот «тоғни қучиб турувчи» дизайни билан ажралиб туради ва дунёдаги энг узун шаҳар эскалатори сифатида рекорд ўрнатди.
Нозимбек Мардонов, Ёқуб Мелибоев, Салим Обиджонов ЎзА
