Жиззах вилояти прокуратураси учун янги бино барпо этилди
Жиззах шаҳрида қад ростлаган янги бир иморатга қараб, унинг фақат девор, ойна ва эшиклардан иборат бино эмаслигини англаш қийин эмас. Чунки давлат идораси учун барпо этилган ҳар қандай замонавий масканнинг ҳақиқий қиймати унинг ташқи кўринишидагина эмас, балки одамларга яратган имконияти, эл-юрт манфаатига қўшган ҳиссаси билан ўлчанади.
Шу маънода Жиззах вилоят прокуратураси учун барпо этилган янги маъмурий мажмуа ҳам аввало халқ учун яна бир қулайликдир. Энди фуқаронинг мурожаати, унинг қонуний ҳақ-ҳуқуқи ва дарди билан боғлиқ масалаларни кўриб чиқиш учун замонавий шароитларга эга муҳит мавжуд.
Бу бинонинг қад ростлашига бир қарашда оддий қурилишдек баҳо бериш мумкин. Аммо унинг замирида мамлакатимизда амалга оширилаётган улкан бунёдкорлик жараёни, давлат идоралари фаолиятини замон талаблари асосида ташкил этишга қаратилган эътибор ва, энг муҳими, мустақиллик йилларида шаклланган имкониятлар мужассам.
Янги бинода фуқароларни қабул қилиш, мурожаатларни тезкор кўриб чиқиш ва ходимларнинг самарали меҳнат қилиши учун барча зарур шароитлар яратилган. Демак, бу ерда гап фақат прокуратура ходимларига қулай иш жойи яратиш ҳақида эмас. Масаланинг иккинчи, янада муҳим томони бор: қулай идора — фуқаро учун ҳам қулай хизмат дегани.
Зеро, одамлар давлат идорасига ўз хоҳиши билан эмас, аксар ҳолларда муайян муаммо ёки ҳуқуқий масала билан келади. Унинг учун қабулхонадаги шароит, мурожаатини баён этиш имконияти, масъул ходим билан мулоқот маданияти ва масаланинг ўз вақтида кўриб чиқилиши жуда муҳим. Янги иншоот ана шу талабларга жавоб берадиган муҳитни шакллантиришга хизмат қилади.
Тадбирнинг очилиш маросимида Жиззах вилояти ҳокими Улуғбек Мустафоев, вилоят прокурори Бахтиёр Иброҳимов, нуронийлар ва соҳа вакиллари иштирок этишди. Улар янги бинонинг ходимлар ва фуқаролар учун яратилган шароитлари билан танишишди.
Бу иншоотга фақат “янги прокуратура биноси” деб қараш камлик қилади. У — мустақиллик йилларидаги бунёдкорлик салоҳиятининг бир кўриниши, замон билан ҳамнафас давлат бошқарувининг бир белгиси ва энг муҳими, халқ учун яратилган яна бир ажойиб қулайликдир.
А.Қаюмов, Ж.Ёрбеков (сурат), ЎзА мухбирлари
