Жавоҳир Синдоров жамоаси Ҳиндистон мусобақасида пешқадам
Бугун, 10 сентябрь куни Ҳиндистоннинг Бангалор шаҳрида жамоалар ўртасида давом этаётган “Tech Mahindra Global Chess League” турнирининг навбатдаги кунида ҳамюртимиз Жавоҳир Синдоров етакчилигидаги “FYERS American Gambits” жамоаси россиялик Ян Непомняший, Полина Шувалова, америкалик Левон Аронян, Леньер Домингес сингари маҳоратлиларни жамлаган “Gambits Ganges Grandmasters” жамоаси билан куч синашади.
Жавоҳир Синдоров биринчи тахтада россиялик Ян Непомняшийга қарши дона сурса, иккинчи тахтада Ниҳал Сарин Аронян, Даниил Дубов Домингес, Бибисара Ассаубаева Шувалова қаршилигини енгишга ҳаракат қилади.
Мукофот жамғармаси 1 миллион АҚШ долларидан иборат мазкур турнирнинг кеча ўтказилган баҳсида “FYERS American Gambits” жамоаси “Triveni Continental Kings” билан рўбарў келди.
Ушбу қарама-қаршилик ўйинида деярли барча учрашувларда муроса йўли танланган бўлса, Жавоҳир Синдоров Алиреза Фирузджани мағлуб этиши натижасида “FYERS American Gambits” шахматчилари 8:5 ҳисобида ғалабага эришди.
Бугунги тур учрашувлари олдидан Синдоров жамоаси 12 очко билан қўшимча кўрсаткичларга кўра, пешқадамликни давом эттирмоқда.
Магнус Карлсен етакчилигидаги “Alpine Apl Pipers” ва Ян Непомняший сардорлигидаги “Ganges Grandmasters” жамоалари 12 очко билан кейинги поғоналарни банд этган.
Айланма тизимда ўтаётган мусобақалар 12 сентябрга қадар давом этади.
Т. Рўзиев, ЎзА
