Хитойнинг икки ҳарбий кемаси Жанубий Хитой денгизидаги Хуаньянь ороли яқинида Филиппин кемасини таъқиб қилаётган вақтда тўқнашиб кетди, деб ёзмоқда “Manila Bulletin”.

Хитойнинг қирғоқ қўриқлаш кемаси реактив сув пуркагич ёрдамида Филиппин кемасини қувган ва таъқиб пайти, кутилмаганда, бошқа йирикроқ қирғоқ қўриқлаш кемасига тўқнашиб кетган. Натижада ҳарбий кема саҳнида тешик ҳосил бўлиб, қайиқнинг камон қисми деформацияга учраган. Шунга қарамай, Филиппин кемаси таъқиби давом этган.

- Хитой қирғоқ қўриқлаш хизмати бизнинг қирғоқ қўриқлаш хизмати ва бошқа денгиз кемаларимизга қарши хавфли ҳаракатларини тўхтатиши керак, - деган Филиппин Президенти Жинггой Эстрада. - Бундай тактика нафақат денгиз ходимлари ва балиқчиларимизга хавф туғдиради, балки кераксиз ҳолатда кескинлик кучайишига сабаб бўлади. Бошқача айтганда, логистик устунлик намойишидан бошқа ҳеч нарса эмас.

Душанба куни эрталаб Хитой қирғоқ хавфсизлиги вакили Гань Юй Хитой томони Филиппин кемаларини қувиб чиқариш учун зарур чоралар кўргани, жумладан кузатиб бориш, тўсиб қўйиш ва кузатиш ҳаракатлари амалга оширилганини айтган эди.

Ҳар икки томон даъво қилиб келадиган Жанубий Хитой денгизидаги баҳсли ҳудудларда бундай ҳодисалар вақти-вақти билан содир бўлиб туради. Ўнлаб йиллар давомида Осиё-Тинч океани минтақасидаги бир неча давлат, хусусан Хитой, Вьетнам, Бруней, Малайзия ва Филиппин баъзи оролларга турли даражада эгалик юзасидан тортишиб келади. Зеро, бу ҳудуддаги Сиша архипелаги, Наньша ва Хуаньянь оролларида муҳим углеводород захираси бисёр.

С.Раҳимов, ЎзА