«Жаңа Өзбекстан» университетінде жасанды интеллект пен іргелі ғылымдар бойынша халықаралық ғалымдар бас қосты
Өзбекстан мен Корея Республикасының ынтымақтастығы аясында жасанды интеллект пен іргелі ғылымдардың тоғысына арналған халықаралық конференция әлем ғалымдарын біріктірді. Жиында болашақ ғылымының бағытын айқындайтын соңғы зерттеулер талқыланды.
«Жаңа Өзбекстан» университеті мен Корея Республикасындағы «Soongsil» университетінің бірлесуімен беделді халықаралық ғылыми конференция ұйымдастырылды. Оған Өзбекстан, Корея Республикасы және Қытайдың жетекші ғалымдары мен зерттеушілері қатысып, жасанды интеллект (ЖИ), математика, статистика, химия және сабақтас ғылымдар саласындағы соңғы ғылыми әзірлемелерді талқылады.
Конференцияның ашылу салтанатына «Жаңа Өзбекстан» университетінің ректоры Баходир Ахмедов, Корея Республикасының Өзбекстандағы Төтенше және Өкілетті елшісі Вон До Ён, «Soongsil» университетінің вице-президенті Джанг Кён Нам және осы университеттің Жаратылыстану ғылымдары колледжінің деканы Канг Викёнг қатысты.
Салтанатты шара бағдарламасы жасанды интеллект саласындағы заманауи зерттеулердің пәнаралық сипатын көрсетті. Баяндамаларда омикс деректеріне арналған терең оқытуға негізделген жолдарды талдау, Жордан алгебралары мен органоид кескіндерін талдау, көп белгili және этносаралық полигендік қауіп шкаласының модельдері секілді өзекті тақырыптар қамтылды. Бұл ғылыми алаң зерттеушілерге өз жұмыстарын таныстыруға, тәжірибе алмасуға, жоғары оқу орындары мен мемлекеттер арасындағы ғылыми ынтымақтастықты нығайтуға мүмкіндік берді.
Іс-шара жасанды интеллектінің математикалық теорияны, статистикалық әдістерді, есептеу тәсілдерін және жаратылыстану ғылымдарындағы практикалық қолдануды байланыстыратын пәнаралық сала ретіндегі рөлінің артып келе жатқанын айқын көрсетіп отыр.
Семинардың екінші күнінде Хадамард кеңістіктеріндегі статистика және граф сигналдары үшін өлшемділікті азайту әдістері сияқты тақырыптар қарастырылып, қазіргі жасанды интеллект жүйелерінің терең математикалық және статистикалық негіздері таныстырылады.
Конференцияның соңғы күні таза математикалық зерттеулердегі жасанды интеллектінің рөліне арналған арнайы сессиямен жалғасады. Онда «Жаңа Өзбекстан» университетінің ғалымдары күрделі математикалық тақырыптар бойынша баяндамалар жасайды.
Семинар 4 қазанға дейін жалғасады.
