ХДП ёшларнинг сиёсий билимини синовдан ўтказди
Ўзбекистон Халқ демократик партияси Сурхондарё вилоят кенгаши Термиз давлат университетида олий таълим муассасалари талабалари ўртасида “Сиёсатдаги ёшлар” интеллектуал ўйинини ўтказди.
Унда Термиз давлат университетининг “Стратеглар”, “Демократлар” ва “Ренесанс”, Термиз муҳандислик ва агротехнологиялар университетининг “Тонги юлдуз”, Тошкент тиббиёт академиясининг “Айсберг” ҳамда “Парадок”, Термиз иқтисодиёт ва сервис университетининг “Фемида” жамоалари ўз билимларини синовдан ўтказди. Сиёсий-ҳуқуқий, жамиятда фаол фуқаролик позициясини шакллантириш, давлат бошқаруви, қонунчилик ҳамда парламент фаолияти каби мавзулардаги саволларга жавоб бериб, иқтидор ва ташаббускорлигини намойиш этди.
Қизғин баҳс-мунозараларга бой бўлган интеллектуал ўйин якунида биринчи ўрин “Стратеглар” жамоасининг билимдон ёшларига насиб этди. Иккинчи ўринни “Демократлар” жамоаси эгаллади. “Фемида” жамоаси талаба-ёшлари учинчи ўринни қўлга киритди.
Ғолиб жамоалар ва фаол иштирокчилар партиянинг диплом ҳамда эсдалик совғалари билан тақдирланди.
Холмўмин Маматрайимов,
ЎзА мухбири
