Европа Путин ва Зеленскийни бир даврада кўрмоқчи
Буюк Британия, Франция ва Германия Украина ҳамда Россия ўртасида тўғридан-тўғри музокара бошланишини қўллаб-қувватлади. Лондонда бўлиб ўтган учрашувдан сўнг эълон қилинган қўшма баёнотда музокара АҚШ ва Европа давлатларининг фаол иштирокида кечиши кераклиги таъкидланди. Ташаббуснинг асосий мақсади ўт очишни тўхтатиш ва тинчликка йўл очишдир.
Музокарада Украина ва Франция Президентлари Владимир Зеленский ва Эммануэль Макрон, Буюк Британия Бош вазири Кир Стармер, Германия Канцлери Фридрих Мерц иштирок этди. Томонлар можарони дипломатик йўл билан ҳал қилиш имкониятни муҳокама қилди. Шунингдек, фронтдаги мавжуд алоқа чизиғи эҳтимолий музокара учун бошланғич нуқта бўлиши мумкинлиги қайд этилди.
Аввалроқ Зеленский Россия Президенти Владимир Путинга юзма-юз учрашув ўтказиш таклифини берган. Кремль раҳбари эса тинчлик келишуви бўйича аниқ асос пайдо бўлмас экан, бундай мулоқотдан маъно кўрмаётганини айтган. Демак, бевосита учрашув тақдири ҳозирча мавҳум.
Европа етакчилари Россиянинг Украина шаҳарларига қарата ракета ва дрон ҳужумини ҳам қоралади. Улар ҳаво мудофааси имкониятини кенгайтириш, янги тутиб қолувчи ракеталар ишлаб чиқариш ва баллистик таҳдидга қарши қўшма лойиҳаларни ривожлантириш зарурлигига урғу берди. Киев Ғарбдан қўшимча қурол-яроқ ва ўқ-дори сўрашда давом этяпти.
РФ – Украина уруши бешинчи йилга қадам қўйган бир пайт дипломатик ҳаракат яна фаоллашди. Фронтдаги вазият ва томонлар ёндашуви орасида сезиларли тафовут бор. Шу боис эҳтимолий музокара натижа бериш-бермаслиги ҳозирча ноаниқ.
Мусулмон Зиё, ЎзА
