Европа кубоги: 3-турда Абдусатторов ғалабага эришди, Ёқуббоев эса рақибига йўл берди
Черногориянинг Будва шаҳрида шахмат бўйича клублар ўртасида ўтаётган Европа кубогининг кеча якунланган 3-турида маҳоратли шахматчиларимиз Нодирбек Абдусатторов ва Нодирбек Ёқуббоев ўз жамоалари шарафини ҳимоя қилди.
Нодирбек Абдусатторов дона сураётган “SuperChess Romania” жамоаси “Cheddleton Savills Caterling” жамоасини 5:1 ҳисобида мағлуб этган вазиятда ҳамюртимиз ушбу жамоа вакили Балаж Чонкани доғда қолдирди.
Нодирбек Ёқуббоев қатнашаётган “Novy Bor Chess Club” аъзолари “C.A. Silla Integrant Col-lectius” жамоасидан 4:2 ҳисобида устунликка эришган вазиятда Ёқуббоев рақиб жамоаси аъзоси Алвар Алонсо Росселга ютқазиб қўйди.
Ортда қолган 3 та тур ўйинларидан кейин Европа кубогида Озарбайжоннинг “Vugar Gashimov” жамоаси 6 очко билан қўшимча кўрсаткичлар ҳисобига пешқадамлик қилмоқда.
Шунингдек, 11 та жамоа қаторида “SuperChess Romania” ҳамда “Novy Bor Chess Club” ҳисобида ҳам 6 очко бор.
Бугун, 20 октябрь куни умумий мукофот жамғармаси 40 минг евродан иборат Европа кубогининг 4-тур мусобақасида Нодирбек Абдусатторовнинг “SuperChess Romania” жамоаси айнан “Vugar Gashimov” билан, Ёқуббоев шарафини ҳимоя қилаётган “Novy Bor Chess Club” аъзолари “Rishon LeZion” жамоаси билан баҳс олиб боради.
Эслатиб ўтамиз, 7 та турдан иборат бўлган Европа кубоги мусобақалари 23 октябрга қадар давом этади.
Т. Рўзиев, ЎзА
