Эрон АҚШ билан музокараларга рози бўлди (+видео)
Теҳрон охирги дақиқаларда АҚШ билан музокараларни давом эттиришга розилик берди, деб хабар қилди DW нашри.
Хабарларга кўра, Эрон олий раҳбари Оятуллоҳ Можтаба Ҳумонаий АҚШ билан музокараларни давом эттиришга рухсат берган.
Аввалроқ Эрон Ислом инқилоби қўриқчилар корпуси музокараларга қарши чиқиб, АҚШ Ҳурмуз бўғозига қўйган чекловлар бекор қилинмагунча суҳбатни рад этишни талаб қилган.
Шу билан бирга, Покистон, Миср ва Туркия воситачилари ҳам Теҳронни музокара жараёнидан чиқмасликка чақирган.
АҚШ президенти Дональд Трамп Теҳрондан жавоб кутар экан, икки ҳафталик сулҳни узайтирмаслигини айтган эди, бироқ уни яна бир кунга узайтирди. Трампнинг айтишича, агарда келишувга эришилса, Эронда ядро қуроли бўлмайди.
Эсингизда бўлса, 11–12 апрель кунлари бўлиб ўтган биринчи музокара босқичи натижа бермаган эди. Эрон томони бунга сабаб қилиб АҚШ ўз позициясини тез-тез ўзгартириши ва денгиз чекловларини асосий тўсиқ деб атаган.
Ундан кейин Эрон кемасининг АҚШ ҳарбийлари томонидан таъқибга учраши, вазиятни янада чигаллаштириб юборди. Эрон ҳарбийлари АҚШни сулҳни бузганликда айблаб, жавоб чоралари кўрилишини билдирган.
Гарчи Можтаба Ҳумонаий томонидан музокараларга рухсат берган бўлсада, Эрон парламенти спикери Муҳаммад Бағир Ғолибоф таҳдид остида музокара ўтказилмаслигини айтмоқда. У Трампни музокара столини таслим бўлиш столига айлантиришга уринмоқда деб танқид қилган.
<iframe width="650" height="420" src="https://www.youtube.com/embed/2gFJ2CKZEkU" title="Eron AQSH bilan muzokaralarga rozi bo‘ldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
