Дори воситаларини реализация қилиш талабларига қатъий риоя этилиши таъминланади
Мамлакатимизда мулкдорлар ҳуқуқларининг кафолатларини кучайтириш, қишлоқ хўжалиги маҳсулотларини етиштирувчиларнинг фаолиятини қўллаб-қувватлаш, аҳолини сифатли ва хавфсизлиги кафолатланган дори воситалари ҳамда тиббий буюмлар билан таъминлашга эътибор кучайтирилди.
Сенат ялпи мажлисида кўриб чиқилган “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун шу йўналишдаги ишларни янада яхшилашга қаратилган.
Сенатнинг Аграр, сув хўжалиги масалалари ва экология қўмитаси раиси Анвар Тўйчиев қонун билан Жиноят кодекси, Маъмурий жавобгарлик тўғрисидаги кодекс, Ер кодекси ҳамда “Фермер хўжалиги тўғрисида”ги ва “Давлат божи тўғрисида”ги қонунларга ўзгартириш ва қўшимчалар киритилаётганини таъкидлади.
Хусусан, Ер кодексига ер участкасини ижарага олиш шартномаси бўйича ҳуқуқ ва мажбуриятларни тўлиқ ёки қисман бошқа шахсга ўтказиш (қайта ижарага бериш)га рухсат беришни назарда тутувчи қўшимча киритилмоқда.
“Фермер хўжалиги тўғрисида”ги қонунга фермер хўжалиги раҳбари тадбиркорлик фаолияти билан шуғулланишга йўл қўйилмайдиган ишга қабул қилинганда, ер участкасини ижарага олиш ҳуқуқини ўз оила аъзоларидан бирига бериши мумкинлиги белгиланмоқда.
Жиноят кодекси ҳамда Маъмурий жавобгарлик тўғрисидаги кодексда товарлар ва молиявий маблағларнинг эркин ҳаракатланишига ёки реализация қилинишига қонунга хилоф равишда аралашганлик ёхуд тўсқинлик қилганлик учун жавобгарлик назарда тутилмоқда.
Дори воситаларини рецепт бўйича чакана реализация қилиш тартибини бузиш билан боғлиқ ҳуқуқбузарликлар ҳамда жиноятлар учун жавобгарликни кучайтиришни назарда тутувчи ўзгартиришлар киритилмоқда.
“Давлат божи тўғрисида”ги қонунга “Ватандош” картаси эгаларининг оила аъзолари учун амалдаги виза муддатини кўп марталик виза этиб узайтирганлик ҳамда “Ватандош” картаси эгаси ва унинг оила аъзолари турган жойи бўйича рўйхатдан ўтказилганлик, шунингдек, турган жойи бўйича рўйхатдан ўтказилганлик муддати узайтирилганлиги учун давлат божи тўлашдан озод қилинишини назарда тутувчи ўзгартириш ва қўшимчалар киритилмоқда.
Сенаторлар маъқуллаган қонун қишлоқ хўжалигига мўлжалланган ер участкаларидан самарали фойдаланиш, қишлоқ хўжалиги маҳсулотларини етиштирувчиларнинг қонуний манфаатларини ҳимоя қилиш ва уларнинг молиявий имкониятларини кенгайтиришга замин яратади. Бундан ташқари, аҳоли саломатлигини ишончли ҳимоя қилиш, дори воситаларини реализация қилиш талабларига қатъий риоя этилишини таъминлашга хизмат қилади.
Н.Абдураимова, Н.Ҳайдаров (сурат), ЎзА
