АҚШнинг Калифорния штати Оушенсайд шаҳрида Тошкент вақти билан 20 апрель куни эрта тонгда профессионал бокс турнири ўтказилади. Унда мамлакатимизнинг иқтидорли боксчиларидан бири Руслан Абдуллаев рингга кўтарилади.

“Frontwave Arena” мажмуаси мезбонлик қиладиган мазкур бокс оқшоми таниқли собиқ профессионал боксчи Оскар Де Ла Хойяга тегишли “Golden Boy Promotions” промоутерлик компанияси томонидан ўтказилмоқда. Ушбу компания билан шартнома имзолаган Руслан Абдуллаев супер енгил вазн тоифасида ўзининг профессионал рингдаги иккинчи жангини филиппинлик Жино Родригога қарши ўтказади.

Шуни таъкидлаб ўтиш лозимки, Русланнинг навбатдаги рақиби фаолияти давомида 19 та жанг ўтказиб, 13 ғалаба, 4 мағлубият ва 2 дуранг натижага эришган бўлса, боксчимиз шу йилнинг 7 март куни АҚШнинг Индио шаҳрида ташкил этилган турнирда мексикалик Хосе Валенсуэла Альварадони иккинчи раундда нокаутга учратган.

Жавоҳир Тошхўжаев, ЎзА