Бокс: Жаҳон чемпионлари реванш жангини ўтказади
Бир ярим йил олдин шов-шув келтириб чиқарган ўзбек ва рус боксчилари ўртасидаги тўқнашувнинг реванш жанги ташкил этилади.
Бу ҳақда хабар берган Россия бокс федерацияси Миразиз Мирзахалилов - Всеволод Шумков ўртасидаги ушбу жанг жорий йилнинг 4 май куни Санкт-Петербург шаҳридаги "КСК Арена" мажмуасида ўтадиган IBA.Pro Чемпионлар оқшомининг асосий баҳсида руй беришини тасдиқлади.
Айтиш лозим, ҳаваскор бокс бўйича 2019 йил Екатеринбургда ташкил этилган жаҳон чемпионатида ғолибликка эришган ҳамюртимиз Миразиз Мирзахалилов ва 2025 йил Дубайда ўтган жаҳон чемпионатида олтин медални қўлга киритган россиялик Всеволод Шумков ўртасидаги биринчи жанг 2024 йил сентябрь ойида Озарбайжоннинг Боку шаҳрида ўтказилган эди.
Ўшанда ҳакамларнинг баҳсли қарорлари эвазига Россия вакили Мирзахалиловдан устун келган.
Яна бир қизиқ факт. Ҳаваскор боксда 66 та жангда рингга кўтарилиб, 56 тасида ғалабага эришган Всеволод Шумков 2018 йил Венгрия пойтахти Будапештда ёшлар ўртасида ўтказилган жаҳон чемпионати финалида Ўзбекистон терма жамоаси аъзоси Абдумалик Халаковдан 5:0 ҳисобида мағлубиятга учраган.
Тўлқин Рўзиев,
ЎзА
