Археологлар иштирокида халқаро экспедиция
Ажиниёз номидаги Нукус давлат педагогика институтида Россия Федерацияси Татаристон Республикаси Фанлар академияси А.Х.Халиков номидаги Археология институти ва Москва давлат университети вакиллари билан учрашув бўлиб ўтди.
Унда А.Х.Халиков номидаги Археология институти директори, тарих фанлари доктори, профессор Айрат Ситдиков, ушбу институтнинг катта илмий ходимлари Ренат Валиев, Антонина Губайдуллина, Москва давлат университетидан тадқиқотчилар Николай Ткач, Елена Лисенко, шунингдек, институт вакиллари иштирок этди.
Тадбирда институт ректори в.б. Қувондиқ Қодиров меҳмонларни юртимизга ташрифи билан қутлаб, Ўзбекистон ва Россия олий таълим муассасалари, илмий марказлари ўртасидаги ҳамкорлик ишлари ривожланиб бораётганига тўхталди.
Таъкидлаш жоиз, Россия ва Қозоғистоннинг таниқли олимлари билан ҳамкорликда Нукус тумани ҳудудидаги “Кердер” маданиятига тегишли “Ҳайвонқалъа” тарихий ёдгорлигида 2023-2024 йилларда халқаро экспедиция доирасида археологик қазиш ишлари олиб борилган эди. Бу йилги халқаро археологик экспедиция 3-30 май кунлари оралиғида ўтказилиши белгиланган бўлиб, ҳозирги вақтда институт томонидан тайёргарлик ишлари тўлиқ якунланди.
Учрашувда экспедиция давомида амалга ошириладиган ишлар белгилаб олинди. Тадбир якунида меҳмонлар институтдаги Ажиниёз музейида бўлиб, бу ердаги экспонатлар, тарихий қўлёзма китоблар билан танишишди.
Довуд Абибуллаев, ЎзА мухбири.
