АҚШ Президенти Дональд Трамп чоршанба куни Хитой Халқ Республикасидан кирадиган товарларга янги 125 фоизлик бож жорий этилишини эълон қилди. Бинобарин, Оқ уй бу ставка аллақачон мавжуд бўлган 20 фоизлик йиғимнинг давоми эканига аниқлик киритди.

Вазирлар Маҳкамаси йиғилишида чиқиш қилган Трамп ўз тариф сиёсатини ҳимоя қилиб, Қўшма Штатлар “жуда яхши ҳолатдалиги”ни даъво қилди.

Пекин бунга кеча кучга кирган Америка товарларига 84 фоизлик бож тўлови тартиби билан жавоб қайтарди.

– Адолатли чора кўпчилик томонидан қўллаб-қувватланади, – деди ХХР Ташқи ишлар вазирлиги матбуот котиби Лин Жиан. АҚШ ҳукумати қарорига халқ қарши чиқади, бу ҳаракат муваффақиятсиз якунланади.

– ХХР Европа Иттифоқи раҳбарлари билан эришилган муҳим консенсусни амалга ошириш, алоқа ва алмашинувни мустаҳкамлаш, савдо, сармоя ва саноат ҳамкорлигини чуқурлаштириш учун биргаликда ишлашга тайёр, – деб ёзган расмий “Синьхуа” ахборот агентлиги.

Мусулмон Зиё, ЎзА