АҚШ-Эрон зиддияти: музокаралар ёқасида танглик…
Қўшма Штатлар ва Эрон ўртасидаги тинчлик музокараларининг тақдири ҳали ҳам ноаниқлигича қолмоқда. Исломободда ўтиши мумкин бўлган янги учрашувлар арафасида Теҳрон уларда иштирок этиш масаласини кўриб чиқмоқда, аммо ҳозирча аниқ қарор қабул қилинмаган. Расмийлар Вашингтоннинг портлар бўйича блокадаси ва сулҳ келишувига риоя этмаётганини асосий тўсиқ сифатида баҳоламоқда.
Икки ҳафталик ўт очишни тўхтатиш келишуви якунланишига саноқли кунлар қолгани вазиятни янада мураккаблаштирмоқда. Бу келишув юзлаб инсонлар ҳалок бўлган низони вақтинча тўхтатган эди, бироқ сўнгги воқеалар унинг барқарорлигига шубҳа уйғотмоқда. Айниқса, АҚШ томонидан Эрон кемасининг тўхтатилиши ва Теҳроннинг жавоб қайтариш таҳдидлари тарангликни кучайтирди.
Томонлар музокараларда ўз манфаатларини илгари сурмоқда. Вашингтон янги келишув орқали нефть нархларининг кескин ўсишини тўхтатишни истаса, Теҳрон Ҳурмуз бўғозидаги назоратидан фойдаланиб санкциялар юмшатилишини ва ядровий дастурига нисбатан босим камайтирилишини кўзламоқда. Шу билан бирга, ўзаро ишончнинг пастлиги тезкор келишув эҳтимолини чеклаб қўяётгани айтилмоқда.
Айни пайтда вазият глобал бозорларга ҳам таъсир қилмоқда. Нефть нархлари яна ўсишни бошлади, Ҳурмуз бўғози орқали кема ҳаракати кескин камайди. Агар музокаралар натижа бермаса, сулҳ бузилиши ва уруш қайта авж олиши хавфи сақланиб қолмоқда.
Мусулмон Зиё, ЎзА
